20 YANVAR FACİƏSİNİN İLDÖNÜMÜ QONŞU GÜRCÜSTANDA DA QEYD EDİLİR
Bakı, 18 yanvar (AZƏRTAC). 20 Yanvar faciəsinin 20-ci ildönümü qonşu Gürcüstanda da qeyd olunur.
Xalqımıza qarşı törədilmiş amansız qətliamın 20-ci ildönümü ilə əlaqədar yanvarın 17-də Qardabani rayonunda Gürcüstan Gənclərinə Yardım və Maarifləndirmə Dərnəyinin təşəbbüsü ilə anım mərasimi keçirilmişdir.
Dərnəyin sədri Mürsəl Hacıyev 20 Yanvar faciəsinin başvermə səbəblərindən, keçmiş sovet ordusunun dinc insanları xüsusi qəddarlıqla qətlə yetirməsindən danışmış və bunu insanlığa yaraşmayan hadisə kimi qiymətləndirmişdir.
Daha sonra çıxış edənlər sovet ordusunun törətdiyi bu cinayətlərin Azərbaycan xalqına qarşı soyqırımı olduğunu bildirmişlər.
Qeyd olunmuşdur ki, müasir Azərbaycan öz müstəqilliyini qəhrəman oğul və qızlarımızın qanı bahasına əldə etmişdir və qədirbilən xalqımız onları heç zaman unutmayacaqdır.
Bölmənin digər xəbərləri
