Masallı, 27 dekabr, İlkin Adıyev, AZƏRTAC

Əvvəllər qızlar gəlin köçəndə özləri ilə apardıqları cehiz əşyalarından biri də sandıq hesab olunurdu. Amma son zamanlar bu ənənə unudulmaq üzrədir. Sandığa müəyyən qədər tələbat olsa da, onu düzəldən çox azdır.

AZƏRTAC-ın bölgə müxbiri xəbər verir ki, vaxtilə cənub bölgəsində sandıq ustaları çox olsa da, indi bu peşə ilə məşğul olanlar barmaqla sayılacaq qədərdir. Masallı rayon Ərkivan qəsəbə sakini Seyfəddin Əzizov da onlardan biridir. On beş yaşından bu sənətin sirlərinə yiyələnən usta 20 ildən çoxdur sevdiyi işlə məşğuldur. Masallıda yeganə sandıq ustası olan Seyfəddin bu sənəti atasından öyrənib.

Onun sözlərinə görə, düzəldilən hər bir sandıq zəhmət və diqqət tələb edir: “Ata-babalarımdan miras qalan sandıqçılıq sənətini bu gün də yaşadıram. Bu sənətin sirlərini atamdan öyrənmişəm. İyirmi ildir ki, sandıq düzəldirəm. Əsasən cehizlik - toy-nişan üçün olan sandıqlar düzəldirəm. Əvvəllər sandıqlara daha çox ehtiyac vardı. Hər ailə gəlin köçən qıza cehizlik olaraq sandıq verərdi. Amma indi o ənənə unudulub. Ona görə də son illər əsasən suvenir sandıqlar düzəldirəm. Bu sandıqları da daha çox Masallıya gələn xarici turistlər alırlar”.

Seyfəddin usta deyir ki, sandıq hazırlanması prosesində əvvəlcə taxta, sonra dəmir və divar kağızı işləri görülür. Rəngləmə və bəzəmə işləri isə ən sonuncu mərhələdir. İstifadə olunan taxtalar yaxşı qurudulmalıdır ki, sandığın ömrü daha uzun olsun.

Ustanın emalatxanasında müxtəlif ölçülü toy-nişan sandıqları ilə yanaşı, həm də üzərində dövlət atributlarımızın əks olunduğu sandıqlara da rast gəlmək olur.

Övladına da sandıq düzəltməyin sirlərini öyrədən Seyfəddin usta unudulmaqda olan bu peşəni gələcək nəsillərə ötürmək istəyir.