Muncuqlutəpə nekropolu yaxınlığında yaşayış yeri aşkar olunub - REPORTAJ VİDEO
Goranboy, 14 oktyabr, Elcan Məmmədov, AZƏRTAC
Azərbaycan Milli Elmlər Akademiyasının (AMEA) Arxeologiya, Etnoqrafiya və Antropolgiya İnstitutunun Naftalan-Goranboy arxeoloji ekspedisiyasının Muncuqlutəpə nekropolunda arxeoloji qazıntı işləri davam edir. Son tunc-erkən dəmir dövrünə aid, 1 hektardan artıq ərazisi olan Nekropol Goranboy rayonunun Tatarlı kəndi ərazisində yerləşir.
AZƏRTAC-ın bölgə müxbiri xəbər verir ki, 2007-ci ildən qeydə alınan nekropolda elə həmin ildən 2022-ci ilə qədər ümumilikdə fasilələrlə 20 qəbirdə arxeoloji qazıntı işləri aparılıb. 2023-cü ildə nekropolda Xocalı-Gədəbəy mədəniyyətinə aid 12 qəbir qazılaraq tədqiq olunub.
Bu günə qədər qeyd olunan nekropolda 32 qəbir üzə çıxarılıb. Burada qəbirlərin sıx olması daha çox diqqəti cəlb edir.
Əsasən düzbucaqlı və oval formalarda hazırlanmış qəbirlərdə skeletlər sağ və sol yanı üstə, bükülü və yarımbükülü vəziyyətdə aşkar olunsa da, bu il diqqət çəkən məqamlardan biridə bəzi qəbirlərdə qoşa dəfnin həyata keçirilməsi faktının aşkarlanması olub.
AMEA-nın Arxeologiya, Etnoqrafiya və Antropotalogiya İnstitutunun elmi işçisi Müzəffər Hüseynov bildirib ki, bu il Muncuqlutəpə nekropolu yaxınlığında yaşayış yeri də aşkar olunub. “Burada qəbirlər sıx salınıb. Skeletlər üzərində aparılan analizlər bizə daha dəqiq informasiya verəcək. Analizlər nəticəsində ərazidə məskunlaşan insanların yaşayış tərzi, xəstəlikləri, nə qədər yaşamaqları və ölüm səbəbləri haqqında məlumat əldə edəcəyik”,- deyə M. Hüseynov qeyd edib.
Həmçinin bu il tədqiq olunan qəbirlərdən birində oturaq dəfn olunan insan qalıqlarına da rast gəlinib. Qəbirlərdən zəngin maddi-mədəniyyət nümunələri - saxsı qablar, tunc və dəmirdən hazırlanmış xəncərlər, bıçaqlar, müxtəlif maddələrdən hazırlanmış bəzək əşyaları aşkar olunub. Saxsı qabların əksəriyyəti bütöv vəziyyətdə aşkar edilib. Ən çox bəzək əşyalarına muncuqlardan rast gəlinən nekropolda bu günə qədər muncuq aşkar edilməyən qəbir yoxdur.
“O dövrün adət-ənənəsinə uyğun olaraq burada okker və əsasən oturaq dəfn adətlərini görürük. Buradan əldə olunan nümunələr analiz üçün xaricə göndərilib. Abidə ərazisində çoxlu sayda dulusçuluq məmulatı aşkarlanıb. Bu da həmin dövrdə ərazidə dulusçuluğun inkişafından xəbər verir. Eyni zamanda, aşkarlanan çoxlu sayda metal məmulatları metallurgiyanın inkişafından xəbər verir”,- deyə AMEA Arxeologiya, Etnoqrafiya və Antropotalogiya İnstitutunun elmi işçisi Lola Hüseynova deyib.
Qeyd edək ki, bu ilki tədqiqatın əsas nəticələrindən biri də nekropolun yaxınlığında Qala boynu yaşayış yerinin aşkar olunmasıdır. Arxeoloji materialların müqayisəli təhlilinə əsasən qəbirlərin eramızdan əvvəl VIII-VII əsrlərə aid olduğu bildirilir.
Nekropolda arxeoloji tədqiqatların davam etdirilməsi planlaşdırılır.
Bölmənin digər xəbərləri
