Şəhid anası: Rəsulun hər addımı Vətənə bağlılıq, qorxmazlıq və döyüş ruhu ilə dolu idi VİDEO
Biləsuvar, 22 sentyabr, İlkin Adıyev, AZƏRTAC
Ölkəmizin ərazi bütövlüyünü və Azərbaycan Respublikasının Konstitusiya quruluşunu bərpa etmək məqsədilə 2023-cü il sentyabrın 19–20-də həyata keçirilən antiterror əməliyyatında canını Vətən uğrunda fəda edən igidlərimizdən biri də Biləsuvar rayonunun Xırmandalı kəndindən olan Rəsul Yusif oğlu Teymurovdur. O, cəmi 26 illik ömrünü elə mənalı və şərəfli yaşadı ki, adı daim hörmətlə anılacaq.
AZƏRTAC-ın bölgə müxbiri xəbər verir ki, komando qüvvələrinin giziri, şəhid Teymurov Rəsul Yusif oğlu 1997-ci il yanvarın 1-də Biləsuvar rayonunun Xırmandalı kəndində dünyaya göz açıb. Uşaqlıqdan mərdliyi, döyüşkənliyi ilə seçilən Rəsul 2004–2015-ci illərdə Ceyhun Məhərrəmov adına Xırmandalı kənd 1 saylı tam orta məktəbində təhsil alıb. Məktəbdə oxuduğu illərdə həm müəllimlərinin, həm də yaşıdlarının yaddaşında çalışqan, cəsarətli və qətiyyətli bir gənc kimi qalıb. Onun içindəki döyüş ruhu hələ o illərdən özünü göstərib – idmanla məşğul olub, yarışlarda uğurlar qazanaraq həmyaşıdlarından fərqlənib.
Şəhidin anası Səbinə Bəşirova bildirir ki, Rəsul yalnız hərbi əməliyyatlarda deyil, həmişə cəsarətli idi. Lokal antiterror tədbirlərindən öncə də bir sıra əməliyyatlarda uğurla iştirak etmişdi. Onun hər addımı, hər nəfəsi Vətənə bağlılıq, qorxmazlıq və döyüş ruhu ilə dolu idi: “Rəsul çox çevik, cəld və vətənpərvər uşaq idi. Uşaqlıqdan zarafatcıl idi, hər sözü gülə-gülə deyərdi. Məni heç vaxt incitməzdi, həmişə başımızı uca etdi. 7-ci sinifdə idmana başladı, karate ilə məşğul oldu, qaydasız döyüşə maraq göstərirdi. Hər yerdə birincilik qazanırdı, medallarla evə dönürdü.
Bir müddət Rusiyada yaşadı. Azərbaycana qayıdanda isə dedi ki, “Mən hərbçi olmadan yaşaya bilmərəm”. Fiziki hazırlığını nəzərə aldılar və gizirlik kursuna göndərdilər. Sonra Azərbaycan Ordusunun komando birliklərinin sıralarında xidmət etməyə başladı. Rəsul yalnız lokal antiterror əməliyyatlarında deyil, daha əvvəlki bir sıra əməliyyatlarda da uğurla iştirak edib. Onun hər addımı Vətənə bağlılıq, qorxmazlıq və döyüş ruhu ilə dolu idi”.
Şəhidin atası Yusif Teymurov deyir ki, Rəsul uşaqlığından bəhs edib və deyib: “Ürəyi böyük, cəsarətli və mərd bir uşaq idi. Uşaqlıqdan elə bilirdi ki, onu heç nə yıxa bilməz. Hər sözü, hər hərəkəti sanki fərqli idi. Sanki içində böyük bir döyüş ruhu vardı. Hər dəfə əməliyyat zamanı onun sağ-salamat qayıtmağı üçün dua edirdik. Şəhid olduğu gün ürəyimdə qəribə bir hiss vardı… Rəsul həm də ailəsini, yaxınlarını çox sevirdi. Ailə qurmağa hazırlaşırdı, sevdiyi qız üçün planlar qurmuşdu. Hətta, elçiliyini belə etmişdik. Amma həyat bəzən ən gözəl arzuları da yarıda qoyur”.
Qeyd edək ki, Rəsul Yusif oğlu Teymurov Azərbaycan Respublikasının Prezidenti İlham Əliyevin Sərəncamına əsasən ölümündən sonra “Vətən uğrunda” medalı və 3-cü dərəcəli “Vətənə xidmət ordeni” ilə təltif edilib.
Bölmənin digər xəbərləri
