Lənkəranda ikinci çay yığımı FOTOLARDA VİDEO
Lənkəran, 6 iyul, AZƏRTAC
Prezident İlham Əliyevin rəhbərliyi ilə ölkədə regional inkişafın təmin olunması və regional resurslardan səmərəli istifadə edilməsi məqsədilə ənənəvi təsərrüfat sahələrinin dirçəldilməsi strategiyası uğurla yerinə yetirilir. Bu kontekstdə qəbul edilmiş kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı ölkənin ənənəvi sahələrinin daha da inkişaf etdirilməsi, müasir texnologiyalardan istifadə, yerli istehsalın stimullaşdırılması və ixrac potensialının artırılması istiqamətində yeni mərhələnin əsasını qoyub. Belə ənənəvi sahələrdən biri də çayçılıqdır. Əsas çayçılıq bölgələrimizdən biri hesab olunan Lənkəran rayonunda fermerlər məhsul yığımını sürətləndiriblər və hazırda rayonda ikinci çay yığımı mövsümü uğurla davam edir. Əlverişli hava şəraiti, aqrotexniki qaydalara vaxtında və düzgün əməl olunması, həmçinin plantasiyalarda müasir suvarma texnologiyalarının tətbiqi bu il də yüksək məhsuldarlıq üçün zəmin yaradıb.
AZƏRTAC-ın bölgə müxbiri xəbər verir ki, rayonda çay plantasiyalarının sahəsi 547,7 hektara çatdırılıb. Bunun 300 hektara yaxını yeni salınmış sahələrdir. Ötən il 395,8 ton məhsul əldə edilib. Qarşıya qoyulan əsas məqsəd isə çay sahələrini 1000 hektara və illik məhsul istehsalının 800 tona çatdırılmasıdır ki, bu da ölkə üzrə idxaldan asılılığın 15,4 faiz azaldılmasını təmin edəcək.
Rayonun tanınmış çayçı fermerlərindən olan Mirağa Həsənovun təsərrüfatında birinci çay yığımı may ayında başlanıb. Mövsümün ilk mərhələsində plantasiyalardan 50 ton yaşıl çay yarpağı tədarük olunub. Hazırda davam edən ikinci yığım dövründə artıq 15 tona yaxın məhsul toplanıb. Fermerin sözlərinə görə, yığım hələ bir müddət davam edəcək və hava şəraiti əlverişli keçərsə, əlavə məhsulun əldə olunacağı gözlənilir.
Mirağa Həsənov bildirib ki, son illər çay plantasiyalarında tətbiq olunan müasir becərmə üsulları və texnoloji yeniliklər məhsuldarlığın artmasına ciddi təkan verir: "Çay rütubəti sevən bitki olduğundan suvarmanın düzgün təşkili xüsusi əhəmiyyət daşıyır. Təsərrüfatda tətbiq etdiyimiz damcı suvarma sistemi sudan daha səmərəli istifadəyə imkan yaradır. Suvarma əsasən gecə saatlarında həyata keçirilir ki, bu da həm su itkisinin qarşısını alır, həm də torpağın və bitkinin optimal şəkildə nəmlənməsini təmin edir. Nəticədə bitkilərin vegetativ inkişafı sürətlənir, yarpaqların keyfiyyəti yüksəlir və məhsuldarlıq artır".
Fermer qeyd edib ki, çayçılığın inkişafı istiqamətində dövlət tərəfindən həyata keçirilən dəstək mexanizmləri, subsidiyalar və aqrar sahəyə göstərilən diqqət onlara əlavə stimul verir. Əldə olunan müsbət nəticələr gələcək illərdə plantasiyaların sahəsinin genişləndirilməsi və istehsalın daha da artırılması üçün əlverişli şərait yaradır.
Lənkəran Dövlət Aqrar İnkişaf Mərkəzindən verilən məlumata görə, mövsümün əvvəlindən indiyədək sahələrdən 200 tona yaxın yaşıl çay yarpağı tədarük olunub, orta məhsuldarlıq isə hər hektardan 8 sentner təşkil edib. Mövsüm ərzində aqrotexniki tədbirlərin ardıcıl şəkildə həyata keçirilməsi məhsuldarlığın yüksəlməsində mühüm rol oynayıb.
Qeyd edək ki, plantasiyalarda ikinci yığım mərhələsi hazırda davam edir və fermerlər mövsümün sonunadək ümumi məhsul istehsalının daha da artacağını proqnozlaşdırırlar.
Müxbir- İlkin Adıyev
Bölmənin digər xəbərləri
