“Mygov”da süni intellekt texnologiyalarının tətbiqi dövlət xidmətlərini daha sürətli və fərdiləşdirilmiş şəkildə təqdim edir - ŞƏRH VİDEO
Bakı, 16 iyul, AZƏRTAC
Azərbaycanda rəqəmsal transformasiya yeni mərhələyə qədəm qoyub. Əgər əvvəlki dövrlərdə dövlət qurumları rəqəmsallaşmanı əsasən ayrı-ayrılıqda həyata keçirirdisə, indi əsas məqsəd bütün xidmətlərin vahid rəqəmsal ekosistemdə birləşdirilməsi, vətəndaşların dövlət xidmətlərinə daha rahat çıxışının təmin edilməsidir.
Bu fikirləri AZƏRTAC-a açıqlamasında Rəqəmsal İnkişaf və Nəqliyyat Nazirliyi yanında İctimai Şuranın üzvü, Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri Elvin Abbasov səsləndirib.
Ekspert qeyd edib ki, Azərbaycanda rəqəmsal transformasiya son illər ərzində bir neçə mərhələdən keçib: “Azərbaycanda bir neçə ildir ki, rəqəmsal transformasiya müxtəlif dövrlərdə müxtəlif formalarda həyata keçdi. İlk mərhələdə hər qurum öz daxilində xidmətlərini rəqəmsallaşdırmağa başladı. Daha sonrakı dövrlərdə isə qurumların yaratdığı xidmətlər bir-biri ilə rəqəmsal müstəvidə əlaqə qurmağa başladı. Bunun nəticəsində vətəndaş üçün xidmətlər daha əlçatan oldu. İndi isə yeni transformasiya mərhələsi başlayıb. Artıq bir çox dövlət qurumları xidmətlərinin 90 faizini rəqəmsallaşdırıb”.
E.Abbasov qeyd edib ki, dövlət xidmətlərinin sayının artması və müxtəlif qurumların çoxsaylı portal və mobil tətbiqlər yaratması vətəndaşlar üçün müəyyən çətinliklər də formalaşdırıb: “Bir qurumun bəzən bir tətbiqi var, bəzən 5 tətbiqi, bir neçə portalı olur və vətəndaş artıq hansı xidmətə haradan müraciət etməli olduğunu müəyyənləşdirməkdə çətinlik çəkir. Buna görə də növbəti transformasiya mərhələsi kimi vahid rəqəmsal hövzənin yaradılmasına ehtiyac yarandı. Bu, inkişaf etmiş ölkələrdə tətbiq olunan beynəlxalq yanaşmadır və Azərbaycan da bu modeli tətbiq edir”.
Onun sözlərinə görə, bu yanaşmanın əsas elementi “Mygov” platformasıdır: “Rəqəmsallaşmanın növbəti mərhələsində dövlət qurumlarının məlumatları vahid hövzədə birləşir və vətəndaş artıq onlarca tətbiq arasında seçim etmək məcburiyyətində qalmır. Dövlətlə vətəndaş arasında rəqəmsal münasibətlər “Mygov”da cəmlənir. “Mygov” beynəlxalq standartlara uyğun şəkildə qurumların xidmətlərini vətəndaşa daha əlçatan edir”.
Elvin Abbasov bildirib ki, platformada süni intellekt texnologiyalarının tətbiqi dövlət xidmətlərinin daha sürətli və fərdiləşdirilmiş şəkildə təqdim edilməsinə imkan yaradır: “Artıq dövlət xidmətləri süni intellektəsaslı həllərlə inteqrasiya olunur. Əvvəllər vətəndaş eyni məlumatı müxtəlif formalarda dəfələrlə daxil edirdi. İndi isə dövlət həmin məlumatları digər qurumlardan rəqəmsal xidmətlər vasitəsilə əldə edir. Məsələn, hər hansı müraciət zamanı sağlamlıq və ya digər arayışlar sistemdə mövcuddursa, vətəndaşın onları yenidən təqdim etməsinə ehtiyac qalmayacaq”.
Ekspert hesab edir ki, böyük həcmdə məlumatların emalında süni intellektdən istifadə həm dövlət, həm də vətəndaş üçün mühüm üstünlüklər yaradır: “Məlumat hövzəsi artıq çox böyükdür. Milyonlarla məlumatın təhlilini insanın həyata keçirməsi mümkün deyil. Süni intellekt isə saatlarla və ya günlərlə aparılan təhlili saniyələr ərzində həyata keçirə və hər bir müraciətə fərdi yanaşma göstərə bilir. Bu, xidmətlərin göstərilmə müddətinin də əhəmiyyətli dərəcədə azalmasına səbəb olacaq”.
Onun sözlərinə görə, süni intellekt və vahid məlumat bazası vətəndaşın hansı xidmətə ehtiyac duyduğunu da müəyyən edə biləcək: “Vətəndaş bəzən hansı arayışa və ya hansı xidmətə ehtiyac duyduğunu bilmir. Süni intellektəsaslı sistem onun yazdığı sorğuya uyğun olaraq lazımi xidməti avtomatik təklif edəcək. Bu yanaşma vətəndaşyönümlü dövlət xidmətlərinin formalaşdırılmasına xidmət edir”.
Elvin Abbasov rəqəmsal transformasiyanın dövlət səviyyəsində prioritet istiqamətə çevrildiyini də diqqətə çatdırıb: “Rəqəmsal Şuranın yaradılması və ölkə rəhbərliyi səviyyəsində bu istiqamətə xüsusi diqqət göstərilməsi Azərbaycanın rəqəmsal transformasiyanı strateji prioritet kimi müəyyən etdiyini göstərir. Bu gün ölkənin bütün rayonlarında yüksəksürətli internet infrastrukturu formalaşdırılıb və bu, rəqəmsal xidmətlərin geniş tətbiqi üçün əlverişli zəmin yaradır”.
Ekspert əlavə edib ki, informasiya texnologiyaları artıq qlobal iqtisadiyyatın əsas istiqamətlərindən birinə çevrilib və Azərbaycanda bu sahənin inkişafı üçün yeni hüquqi mexanizmlər də yaradılır.
Müxbir – Pərvanə Qafarova
Bölmənin digər xəbərləri
