“Binəqədi gənclərinin III liderlik məclisi”nə yekun vurulub
Bakı, 7 noyabr, AZƏRTAC
“İslam Həmrəyliyi İli” çərçivəsində Binəqədi Rayon İcra Hakimiyyəti, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası, Yeni Azərbaycan Partiyası (YAP) Binəqədi rayon təşkilatı, rayonun gənclər və idman idarəsinin təşkilatçılığı ilə keçirilən Binəqədi gənclərinin III liderlik məclisinə yekun vurulub.
Rayon icra hakimiyyətindən AZƏRTAC-a bildiriblər ki, Vergilər Nazirliyinin Şamaxıdakı Tədris Mərkəzində keçirilən layihənin məqsədi gənclərin hərtərəfli inkişafı üçün əlverişli şəraitin yaradılması, azərbaycançılıq və dövlətçilik prinsipləri əsasında onların vətənpərvərlik tərbiyəsinin gücləndirilməsi, həmçinin gənclərə liderlik bacarıqlarının aşılanması və asudə vaxtlarının səmərəli təşkili olub.
Prezident İlham Əliyevin 2017-ci il 15 sentyabr tarixli Sərəncamı ilə təsdiqlənən “Azərbaycan gəncliyi 2017-2021-ci illərdə” Dövlət Proqramına əsasən reallaşdırılan layihədə bütün sahələr üzrə müsahibə yolu ilə seçilmiş fəal Binəqədi gənclər iştirak ediblər. Həmçinin Suriya, İraq, Fələstin və Misirdən olan gənclər də layihə çərçivəsində keçirilən təlimlərə qatılıblar.
Gənclər əvvəlcə xalqımızın Ümummilli Liderinin Şamaxı şəhərinin mərkəzində ucaldılan abidəsini ziyarət edib, Heydər Əliyev Muzeyi ilə tanış olublar. İştirakçılar muzeydə ulu öndər Heydər Əliyevin mənalı həyatının və çoxşaxəli siyasi fəaliyyətinin müxtəlif məqamlarını, eləcə də Şamaxı rayonuna səfərlərini əks etdirən stendlərlə tanış olublar.
Sonra layihə iştirakçıları Şamaxı Cümə məscidini ziyarət ediblər. İştirakçılara məscidin 743-cü ildə inşa edildiyi və Azərbaycanın ən qədim məscidi olduğu bildirilib. Qeyd edilib ki, Prezident İlham Əliyevin Sərəncamına əsasən yenidən qurulan məscid 2013-cü ilin mayında istifadəyə verilib.
Daha sonra Şamaxıda Vergilər Nazirliyinin Tədris Mərkəzində “Binəqədi gənclərinin III liderlik məclisi”nin açılışı olub.
Açılış mərasimində layihənin məqsədi barədə məlumat verən Binəqədi Rayon İcra Hakimiyyəti başçısının müavini Aygün Əliyeva Prezident İlham Əliyevin rəhbərliyi ilə Azərbaycanda həyata keçirilən uğurlu dövlət gənclər siyasəti nəticəsində əldə olunan nailiyyətlərdən danışıb. Bildirib ki, “Binəqədi gənclərinin I və II liderlik məclisləri” 2014-cü və 2015-ci illərdə müvəffəqiyyətlə həyata keçirilib.
Dini Qurumlarla İş üzrə Dövlət Komitəsinin sədr müavini Gündüz İsmayılov, Vergilər Nazirliyinin Tədris Mərkəzinin rəisinin birinci müavini Ceyhun Mehdiyev, Bakı Şəhər Gənclər və İdman Baş İdarəsinin rəisi Raqif Abbasov, YAP Gənclər Birliyinin sədri Seymur Orucov, YAP Binəqədi rayon təşkilatının sədri Ramiz Göyüşov da çıxışlarında dövlət gənclər siyasətinin uğurlu icrasından bəhs edib, layihə iştirakçılarına uğurlar arzulayıblar.
Açılış mərasimindən sonra gənclər üçün ilk təlimə start verilib. Üç gün ərzində “Layihələrin yazılması və idarə olunması” mövzusunda təşkil olunan təlimlərdə gənclərə layihələrin icrası ilə bağlı zəruri məlumatlar verilib.
Layihə çərçivəsində gənclərin Azərbaycan Milli Elmlər Akademiyası nəzdində fəaliyyət göstərən Nəsirəddin Tusi adına Şamaxı Astrofizika Rəsədxanasına tanışlıq səfəri də təşkil olunub. Burada layihə iştirakçılarına rəsədxananın tarixi və fəaliyyəti haqqında məlumat verilib.
Daha sonra iştirakçılar Şamaxının ən qədim kəndlərindən olan Dəmirçi kəndinə gəliblər. Kənddə gənclər qədim sənətkarlıq nümunələri ilə tanış olub, kənd ictimaiyyəti ilə görüşüblər.
Axşam saatlarında gənclərin asudə vaxtının səmərəli təşkili, onların bilik və bacarıqlarının artırılması məqsədilə layihə iştirakçıları arasında intellektual oyunlar keçirilib.
Ümumiyyətlə, layihə çərçivəsində fərqlənən gənclərə qiymətli hədiyyələr təqdim olunub.
Layihənin üçüncü günündə təlimlərə yekun vurulub və gənclər əldə etdikləri biliklər əsasında layihələrini hazırlayıblar. Hazırlanmış layihələr əsasında “Layihə yarmarkası” təşkil olunub. Yarmarkanın yekununda iştirakçılara “Binəqədi gənclərinin III liderlik məclisi”nə qatılmaları barədə sertifikatlar təqdim edilib.
Təqdimat mərasimindən sonra Şamaxı rayon tarix-diyarşünaslıq muzeyində olan gənc liderlər burada nümayiş etdirilən eksponatlara baxıblar.
“İslam Həmrəyliyi İli” çərçivəsində keçirilən “Binəqədi gənclərinin III liderlik məclisi” xoş ovqatla başa çatıb.
Bölmənin digər xəbərləri
