Kəndlərin inkişafı, bölgələrdə yaşayış səviyyəsinin yüksəldilməsi dövlət siyasətinin əsas istiqamətlərindən biridir - ŞƏRH
Bakı, 26 may, AZƏRTAC
Ermənistanın Azərbaycana qarşı apardığı işğalçılıq siyasəti ölkənin bir çox sahələri kimi kənd təsərrüfatına da ciddi zərbə vurmuşdu. Uzun illər işğal altında qalan ərazilərdə əkin sahələri yararsız vəziyyətə düşmüş, bağçılıq və heyvandarlıq zəifləmış, suvarma sistemləri dağıdılmışdı. Bunun nəticəsində kənd təsərrüfatının inkişaf tempi aşağı düşmüş, regionların iqtisadi potensialından tam istifadə mümkün olmamışdı.
Bu sözləri AZƏRTAC-a açıqlamasında Milli Məclisin deputatı Səbinə Xasayeva söyləyib.
O bildirib ki, Vətən müharibəsində qazanılan tarixi Zəfərdən sonra isə azad edilmiş torpaqlarda geniş quruculuq və bərpa işlərinə başlanılması kənd təsərrüfatının inkişafı üçün də yeni imkanlar yaratdı. Aparılan yenidənqurma işləri yolların, enerji və su təminatı sistemlərinin bərpasını əhatə etməklə yanaşı, kənd təsərrüfatı infrastrukturunun yenilənməsinə də xidmət edir. Bu proses regionların sosial-iqtisadi dirçəlişinə mühüm töhfə verir.
“Son illərdə bölgələrdə həyata keçirilən infrastruktur layihələri kənd təsərrüfatının inkişafında mühüm rol oynayıb. Yeni yolların çəkilməsi, su anbarlarının və kanalların tikilməsi, enerji təminatının gücləndirilməsi kənd təsərrüfatı məhsullarının istehsalını artırıb və fermerlərin fəaliyyətini daha da asanlaşdırıb. Eyni zamanda, müxtəlif dövlət proqramları çərçivəsində ənənəvi kənd təsərrüfatı sahələrinin inkişafına dəstək göstərilməsi ölkənin aqrar potensialının genişlənməsinə şərait yaradıb”, - deyə S.Xasayeva vurğulayıb.
Deputatın sözlərinə görə, kəndlərin inkişafı və bölgələrdə yaşayış səviyyəsinin yüksəldilməsi dövlət siyasətinin əsas istiqamətlərindən biri kimi diqqət çəkir. Məqsəd insanların doğma yurdlarında yaşayıb işləməsi, kənd təsərrüfatı və digər ənənəvi fəaliyyət sahələri ilə məşğul olması üçün əlverişli şərait formalaşdırmaqdır. Bu baxımdan regionlarda sosial infrastrukturun yaxşılaşdırılması, xidmət sektorunun inkişaf etdirilməsi və yeni iş yerlərinin yaradılması mühüm əhəmiyyət daşıyır.
“Azad olunmuş ərazilərdə aqroparkların yaradılması, müasir suvarma sistemlərinin tətbiqi və torpaqlardan səmərəli istifadənin təşviqi kənd təsərrüfatının gələcək inkişaf perspektivlərini daha da gücləndirir. Yeni kanalların və su layihələrinin həyata keçirilməsi minlərlə hektar torpağın yenidən əkin dövriyyəsinə qaytarılmasına imkan verəcək. Bu isə məhsuldarlığın artmasına və ölkənin ərzaq təhlükəsizliyinin möhkəmlənməsinə mühüm təsir göstərəcək.
Ümumilikdə isə həyata keçirilən tədbirlər Azərbaycanda kənd təsərrüfatının davamlı inkişafına, regionların iqtisadi gücünün artmasına və kənd yerlərində həyat səviyyəsinin yüksəlməsinə xidmət edir”, - deyə o əlavə edib.
Bölmənin digər xəbərləri
