İDMAN
“DÇ 2018”: Qrup mərhələsinin ikinci turuna Rusiya-Misir oyunu ilə start verilib
Bakı, 19 iyun, AZƏRTAC
İyunun 19-da Rusiya-Misir qarşılaşması ilə futbol üzrə XXI dünya çempionatının qrup mərhələsinin ikinci turuna start verilib.
AZƏRTAC xəbər verir ki, “A” qrupunda yer alan bu komandalar Sankt-Peterburq şəhər stadionunda üz-üzə gəlirlər.
Paraqvaylı referi Enrike Kaseresin idarə etdiyi oyunda Rusiya millisinin baş məşqçisi Stanistlav Çerçesov start heyətdə İqor Akinfeev, Mario Fernandes, İlya Kutepov, Sergey İqnaşeviç, Yuri Jivkov, Aleksandr Samedov, Roman Zobnin, Aleksandr Qolovin, Yuri Qazinski, Denis Çerişev, Artyom Dzyubaya şans verib.
Misir yığmasının argentinalı çalışdırıcısı Hektor Kuper isə ilk onbirliyə Məhəmməd Elşenavi, Ahmet Fathi (k), Ali Qabr, Ahmed Heqazi, Məhəmməd Abdelşafi, Məhəmməd Salah, Tarek Hamed, Abdalla Said, Məhəmməd Elneni, Trezege və Mərvan Mohseni daxil edib.
Misir millisi ilk turda Uruqvaya məğlub olduqdan sonra səkkizdəbir finala yüksəlmək üçün mühüm əhəmiyyət kəsb edən 3 xalı qazanmağa çalışacaq. Rusiya yığması isə açılış matçında Səudiyyə Ərəbistanı yığması üzərində 5:0 hesablı qələbədən sonra bu oyunda da qalib gələrək səkkizdəbir finala vəsiqəni təmin etmək üçün mübarizə aparacaq. Misirlilərin ulduz futbolçusu Məhəmməd Salahın zədədən sonra bu matçda forma geyməsi komandasının qələbə inamını daha da artırıb.
Ümumiyyətlə, Rusiya millisi dünya çempionatlarının final mərhələlərində 1994-cü, 2002-ci və 2014-cü illərdə çıxış edib. Rusiyalılar ev sahibliyi etdikləri mundiala qədər dünya çempionatlarında sonuncu qələbəni 2002-ci ildə Tunis üzərində qazanıblar - 2:0.
Misir yığması isə 1934-cü və 1990-cı illərdəki mundiallardan sonra üçüncü dəfədir dünya çempionatlarında iştirak edir.
Xatırladaq ki, bu, dünya çempionatının altıncı gününün sonuncu – üçüncü qarşılaşmasıdır. Əvvəlki iki görüşdə “H” qrupunda yer alan komandalar üz-üzə gəliblər. Hər iki görüş eyni hesabla (2:1) başa çatıb. Yaponiya yığması Kolumbiyanı, Seneqal isə Polşanı məğlub edib.