İQTİSADİYYAT
Parabank onlayn ödəmə xidmətini istifadəyə verib
Bakı, 26 iyun, AZƏRTAC
Parabank müştərilərə borclarını və ödənişlərini bankın rəsmi səhifəsi vasitəsilə onlayn ödəmək imkanı yaradan xidməti təqdim edir.
Bankdan AZƏRTAC-a bildiriblər ki, bu xidmət banka getmədən, 24 saat real vaxt rejimində asan, operativ və etibarlı olaraq “Kredit ödənişləri”, “Əmanət vəsaitlərinin artırılması”, “Cari hesablara vəsaitlərin mədaxili” kimi bank əməliyyatlarını həyata keçirməsi üçün imkan yaradır.
Bankın rəsmi saytı vasitəsilə “Onlayn ödənişlər” səhifəsinə daxil olub məlumatların eyniləşdirilməsi üçün doğum tarixi və bank hesabı üzrə qeydiyyat nömrəsi (müştəri kodu) daxil edilməlidir. Açılan səhifədə kreditlərin, depozitlərin və hesabların siyahısı bölmələrindən istənilən bank əməliyyatlarını yerinə yetirmək mümkündür. Müştərinin krediti olduğu halda cari hesaba vəsait köçürüldükdən sonra hesaba bağlı kredit üzrə borc müəyyən edilib kredit cədvəlinə uyğun silinəcək. Yatırılan vəsait ödəniş qrafikində nəzərdə tutulmuş məbləğdən artıq olarsa, qalıq məbləğ əsas borcdan çıxılacaq.