® Bakıda 20-ci Yubiley Beynəlxalq “Caspian Investment Forum” keçiriləcək
Bu il noyabrın 26-da Bakı şəhəri 20-ci Yubiley Beynəlxalq “Caspian Investment Forum”a ev sahibliyi edəcək. Forum “Caspian Energy Club”ın və Azərbaycan Milli Biznes Assosiasiyasının təşkilatçılığı, “ABB-İnvest”in baş tərəfdaşlığı, Bakı Fond Birjasının rəsmi tərəfdaşlığı və “Media Balans”ın kreativ tərəfdaşlığı ilə keçiriləcək.
Bu barədə “Caspian Energy Club”ın sədri və qrupun baş icraçı direktoru Telman Əliyev məlumat verib. Onun sözlərinə görə, illərdir regionun iqtisadi gündəmində mühüm yer tutan “Caspian Investment Forum” bu il də yerli və beynəlxalq biznes liderlərini, dövlət strukturlarının nümayəndələrini, nüfuzlu investisiya fondlarını və maliyyə qurumlarını bir araya gətirəcək.
Tədbirdə Azərbaycanla yanaşı, Çexiya, Qazaxıstan, Gürcüstan, Özbəkistan və Türkiyə kimi ölkələrdə fəaliyyət göstərən sahibkarların və sərmayədarların iştirakı gözlənilir.
Forumun əhəmiyyəti və məqsədləri barədə danışan Telman Əliyev bildirib ki, builki tədbir çərçivəsində kapital bazarlarının inkişaf perspektivləri, investor cəlbi və yeni maliyyə alətlərinin tətbiqi əsas müzakirə mövzuları olacaq. “İnvestisiya dalğalarında yenilik rüzgarı” şüarı altında keçirilən forum çərçivəsində iki əsas panel iclası nəzərdə tutulur. “Qiymətli kağızların buraxılması yolu ilə kapital cəlbi” adlı birinci paneldə kapital bazarlarında səhmlərin ilkin kütləvi yerləşdirilməsi (IPO) mövzusu diqqət mərkəzində olacaq. Beynəlxalq təcrübə mübadiləsi məqsədilə tədbirə Qazaxıstan və
Özbəkistanda uğurla IPO həyata keçirmiş şirkətlərin rəhbərləri dəvət olunub. Tədbirdə “ABB-İnvest”in baş tərəfdaşlarından biri olan “DriveWealth LLC” şirkətinin rəhbər heyətinin iştirakı da gözlənilir.
Paneldə, həmçinin ABB-nin İdarə Heyətinin üzvü də çıxış edəcək. Panelə “ABB-İnvest”in icraçı direktoru Nadir Babazadə moderatorluq edəcək.
"Təkrar bazarda qiymətli kağızların ticarəti" mövzusuna həsr olunmuş ikinci sessiyada isə təkrar bazar üzrə səhmlərin və istiqrazların ticarəti müzakirə ediləcək. Panel iştirakçıları arasında ABŞ-da fəaliyyət göstərən “DriveWealth LLC”nin nümayəndəsi, Milli Depozit Mərkəzinin rəsmisi, Bakı Fond Birjasının nümayəndəsi Oqtay Qasımov, eləcə də ABB və “ABB-İnvest”in nümayəndələri yer alacaqlar. Panelin moderatorluğu isə “ABB-İnvest”in nümayəndəsi tərəfindən həyata keçiriləcək.
“İllərdir iqtisadi əməkdaşlığın və investisiya dialoqunun aparıcı platformalarından biri kimi tanınan “Caspian Investment Forum”, Azərbaycanın maliyyə və investisiya mühitinin inkişafına töhfə verməklə yanaşı, Xəzəryanı regionda kapital bazarlarının dərinləşdirilməsi, həmçinin yerli və xarici investorların cəlb olunması baxımından əhəmiyyətli bir tribuna rolunu oynayır”, - deyə Telman Əliyev qeyd edib.
“Forumun əsas məqsədi Azərbaycanın və bütövlükdə Xəzəryanı regionun kapital bazarlarını inkişaf etdirmək, investorlar üçün yeni imkanlar açmaq və maliyyə dialoqunu daha da dərinləşdirməkdir”, - deyən Telman Əliyev fikrini yekunlaşdırıb.
Qeyd edək ki, “Caspian Energy Holding” 2025-ci ildə “Caspian Energy” brendi altında fəaliyyət göstərən bütün networking platformalar, media layihələr, forumlar və mükafatları vahid "Milli.Biz" ekosistemi daxilində birləşdirmək məqsədilə təsis edilib. "Milli.Biz" ekosistemi əsasında “Caspian Energy Club”, Avropa ilə İqtisadi Əməkdaşlıq İctimai Birliyi və Azərbaycan Milli Biznes Assosiasiyası vasitəsilə 100-dən çox ölkədən olan sahibkarlara networking qurmaq imkanı yaradılacaq.
“Caspian Energy Holding”in tərkibinə aşağıdakı qruplar daxildir: “Caspian Energy Club”, “Caspian Energy Club International”, “Caspian Energy EXIFOR Group”, “Caspian Energy International Media Group”,“Award Organizers Group”,“Caspian Energy Research Group”, “Caspian Energy Entertainment Group”,“Caspian Energy Jobs Group”.
“Caspian Energy Club”a daxil olan sahibkarlar vahid "Milli.Biz" ekosistemi çərçivəsində hazırda mövcud olan bütün xidmətlərlə yanaşı, hüquq, maliyyə, turizm, konsaltinq və digər xidmətlərdən yararlana biləcəklər. "Milli.Biz" ekosisteminə inteqrasiya olunan qlobal loyallıq proqramı da tətbiq ediləcək.
2002-ci ildə dünyanın iri transmilli, dövlət və özəl neft-qaz və enerji şirkətləri tərəfindən yaradılan, mənzil-qərargahı Bakıda yerləşən “Caspian Energy Club” dünyanın 50 ölkəsindən 5000-dən çox şirkəti birləşdirən və dinamik inkişaf edən beynəlxalq biznes networking platformasıdır. “Caspian Energy Club” biznes-hökumət dialoqunun fəal iştirakçısıdır və əsas məqsədlərindən biri, Azərbaycanda və “Caspian Energy Club”ın fəaliyyət göstərdiyi digər ölkələrdə investisiya və işgüzar mühitin yaxşılaşdırılmasıdır.
“Caspian Energy Club International” 2023-cü ildə “Caspian Energy Club”ın beynəlxalq layihələrini və dünyanın 63 şəhərində fəaliyyət göstərən xarici ofisləri vahid standartlar əsasında idarə etmək məqsədilə yaradılıb. Bu strukturun nəzdində idarə olunan və yaxın 7 il ərzində dünyanın 100 ölkəsində nümayəndəlik açılması planlaşdırılan Azərbaycan Milli Biznes Assosiasiyası (MİLLİ.BİZ) – ölkə daxilində və ölkə hüdudlarından kənarda Azərbaycan sahibkarlarını birləşdirən, regionlarda istehsal olunan məhsul və xidmətləri beynəlxalq bazarlara çıxaran, həmçinin regionlara beynəlxalq investisiyaların cəlb edilməsində aktiv rol oynayan vahid işgüzar platformadır.
2004-cü ildən fəaliyyət göstərən “Caspian Energy EXIFOR Group” dünyanın 20-dən çox ölkəsində “Caspian Energy Forum”, “Caspian Investment Forum”, Milli Biznesin İnkişafı Forumu, Milli Maliyyə Əlçatanlığı Forumu, “Caspian Innovation Forum” və iqtisadiyyatın fərqli istiqamətlərini əhatə edən beynəlxalq və milli forumlar, “meetup”lar və dəyirmi masalar təşkil edir.
Bölmənin digər xəbərləri
