® Barselonada “Əlifba. A Cultural Alphabet” kitabının təqdimatı keçirilib
İyulun 4-də Barselonanın Palau Dalmases sarayında “NARGIS” jurnalının təşkilatçılığı ilə “Əlifba. A Cultural Alphabet” kitabının təqdimatına həsr olunmuş möhtəşəm mədəniyyət axşamı keçirilib. Dil, illüstrasiya və hekayə vasitəsilə Azərbaycanın mədəni irsini canlandıran bu unikal layihə Rabat, Doha, Berlin və digər şəhərlərdəki uğurlu təqdimatlardan sonra öz beynəlxalq mədəni səyahətini Barselonada davam etdirib.
Gecə geniş auditoriyanı bir araya toplayıb. Qonaqlar arasında Azərbaycan Respublikasının İspaniya Krallığındakı səfirliyinin nümayəndələri, bu ölkənin aparıcı media qurumlarının təmsilçiləri, yaradıcı ziyalılar, tələbələr, gənclər və Kataloniyadakı Azərbaycan diasporunun üzvləri yer alıb. Tədbirin açılışında Azərbaycan Respublikasının Diasporla İş üzrə Dövlət Komitəsinin sədri Fuad Muradov çıxış edib.
Qonaqlar zəngin proqramlı gecədən zövq alıblar: Rəşad Ələkbərovun layihə üçün xüsusi olaraq yaratdığı “Welcome to Baku” adlı instalyasiya, “History in Letters” sənədli animasiya filminin nümayişi (filmin prodüseri və rejissoru Meran İsmayılsoy, ssenarist Ağamehdi Abidov, rəssamlar Kənan Şeyxzamanlı və Nərgiz Heydər), Azərbaycanın müxtəlif bölgələrinə məxsus milli geyimlərin sərgisi, milli mətbəximizin təamlarından ibarət qastronomik hissə, pianoçu Etibar Əsədli və tar ifaçısı Şəhriyar İmanovun iştirakı ilə keçirilən musiqi proqramı. Axşamın simvolik rəmzlərindən biri isə Teymur Qəribovun hazırladığı büllur kristal olub. Bu incə əsər saf dəyərlərin, mədəniyyətin və əbədiyyətin poetik metaforası kimi təqdim edilib.
Tədbir İspaniya Krallığındakı Azərbaycan Respublikasının səfirliyinin və Kataloniyada Azərbaycan diasporunu təmsil edən Barselonadakı Azərbaycan Evinin (Casa Azerbaiyán en Barcelona) dəstəyi ilə təşkil olunmuşdur.
Qeyd edək ki, “Əlifba. A Cultural Alphabet” Azərbaycanın əlifbası vasitəsilə mədəni irsə aparan bir səyahətdir. Hər bir hərf qədim memarlıq nümunələrindən və sənətkarlıq ənənələrindən tutmuş folklor obrazları və görkəmli şəxsiyyətlərə qədər milli kimliyin müxtəlif tərəflərini təqdim edir. Kitab həm uşaqlar, həm də böyüklər üçün nəzərdə tutulub və Azərbaycanın zəngin mədəniyyətini dərindən tanıtmaq məqsədi daşıyır.
Layihənin ideya müəllifi və rəhbəri “NARGIS” jurnalının baş redaktoru Ülviyyə Mahmuddur. O, Azərbaycan mədəniyyətinin dünyada tanıdılması istiqamətində həyata keçirdiyi təşəbbüslərlə tanınır. Kitab ilk dəfə 2019-cu ildə işıq üzü görüb və o vaxtdan bəri müxtəlif ölkələri əhatə edərək bir neçə dilə tərcümə olunub. Kitabın illüstrasiyaları tanınmış rəssam Orxan Hüseynova məxsusdur.
Tədbir Azərbaycan Respublikasının İspaniya Krallığındakı səfirliyi və Azərbaycan Diasporuna Dəstək Fondunun dəstəyilə təşkil olunub.
Bölmənin digər xəbərləri
