® “Gözəllik salonlarında təhlükəli yoluxucu xəstəliklərin yayılması əleyhinə təlimlər” adlı layihə yekunlaşıb
“İnkişafa Doğru Qadın Təşəbbüsü” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə icra etdiyi “Gözəllik salonlarında təhlükəli yoluxucu xəstəliklərin yayılması əleyhinə təlimlər” adlı layihəsini yekunlaşdırıb.
“İnkişafa Doğru Qadın Təşəbbüsü” İctimai Birliyinin sədri, layihə rəhbəri Ziba Nəbiyeva layihədən danışarkən deyib: “Qlobal çağırışlar təhlükəli yoluxucu xəstəliklərlə mübarizədə qüvvələri səfərbər edərək yeni yoluxmaların sayını və ölüm hallarını əhəmiyyətli dərəcədə azaltmağa yönəlibdir. Bu hədəflərə çatmaq üçün qlobal strategiya proqramında vətəndaş cəmiyyəti üzvlərinin fəaliyyəti xüsusilə vurğulanıb. Bu baxımdan təşkilatımız dövlətimizin təhlükəli infeksion xəstəliklərlə mübarizədə sosialyönümlü siyasətinə dəstək olaraq adıçəkilən layihəni icra edib”.
Layihənin məqsədi gözəllik xidməti göstərilən məkanlarda təhlükəli yoluxucu xəstəliklərin yayılması riskinin qarşısını almaq üçün profilaktik tədbirlərin həyata keçirilməsi, əhalinin və bərbər-manikürçü-vizajist ixtisası üzrə təhsil alan şəxslərin aidiyyəti mövzu üzrə maarifləndirilməsidir.
Layihə müddəti ərzində maarifləndirmə işləri bir neçə istiqamətdə aparılıb.
Əvvəlcə onlayn sorğu vasitəsilə xroniki viral hepatitlər, İnsanın İmmunçatışmazlığı Virusu (İİV/QİÇS) və vərəm xəstəliyi, eləcə də gözəllik xidməti məkanlarında bu infeksiyalara yoluxma riskini yaradan səbəblər barədə respondentlərin məlumatlılıq səviyyəsi araşdırılıb.
İştirakçısı 100 nəfər olan sorğunun nəticələri qənaətbəxş olmayıb. Belə ki, respondentlərin təxminən 50 faizi salonlarda manipulyasiya alətlərinin sterilliyi barədə sualları yanlış cavablandırıblar.
Sorğu bitdikdən sonra respondentlərə adı qeyd olunan xəstəliklərin və alətlərin sterilizasiya qaydaları barədə müvafiq maarifləndirici məlumatlar göndərilib.
Əhali arasında maarifləndirmə onlayn platformalar üzərindən televiziya verilişləri və videoposterlər vasitəsilə davam etdirilib.
“Gözəllik salonlarında təhlükəli infeksion xəstəliklərə yoluxma riski varmı?”, “İİV/QİÇS nədir? Ölüm hökmü, yoxsa yaşamaq ümidi?!”, “Vərəm hökmdür, yoxsa diaqnoz?! Vərəm barədə bilmədiklərimiz...” və “Viral hepatitlər nədir və gözəllik salonlarında yoluxma riski varmı?” adlı bir saatlıq 4 veriliş və bu verilişlər əsasında hazırlanmış əsas mesajları özündə ehtiva edən ekspertlərin ikidəqiqəlik 22 sayda videoçıxışları, eləcə də 5 maarifləndirici videoposter hazırlanaraq sosial mediada yayımlanıb. Ümumilikdə televiziya verilişlərinə digər videomateriallarla birlikdə 46 mindən çox baxış sayı olub.
Maarifləndirmə canlı görüşlər, təlimlər vasitəsilə də aparılıb. Aidiyyəti peşə ixtisası üzrə təhsil alan tələbə və müdavimlərə 5 təlim keçirilib. “Gözəl ol və sağlam qal!” devizi altında baş tutan təlimlərdən biri özəl peşə tədris mərkəzində, digəri Dövlət Məşğulluq Agentliyinin Bakı Peşə Hazırlığı Mərkəzində, qalanları isə Peşə Təhsili üzrə Dövlət Agentliyinin tabeliyində olan Bakı Dövlət Peşə Təhsil Mərkəzlərində keçirilib.
Ümumilikdə, təlimlərdə 200 nəfərdən çox şəxs iştirak edib. Sonda sorğu anketləri vasitəsilə iştirakçıların bilikləri qiymətləndirilib. Nəticələr təlim materiallarının yüksək səviyyədə mənimsənildiyini göstərib.
Beləliklə, təşkilat layihə çərçivəsində götürdüyü öhdəlikləri artıqlaması ilə həyata keçirərək uğurlu nəticələrlə başa vurub.
Bölmənin digər xəbərləri
