ABŞ İRAQIN BƏRPASI MƏSƏLƏSINDƏ DƏ KOALİSİYA ÜZVLƏRİNƏ ÜMİD EDİR
İraqın bərpası və Səddam rejimindən sonrakı inkişafı mərhələsində ABŞ koalisiya üzvlərinin yardımına ümid edir. Azərbaycana gəldikdə, Birləşmiş Ştatlar İraqdakı dini ziyarətgah və ocaqların qorunmasında bizim iştirakımızı gözləyir.
ABŞ müdafiə nazirinin müavini Pol Volfovits aprelin 11-də xarici mətbuat nümayəndələri qarşısındakı çıxışında bildirib ki, Azərbaycan əhalisi müsəlman olan bir neçə dövlətlər kimi, sabitlik yaradılması əməliyyatlarında köməyini təklif edib.
AZƏRTAC-ın müxbirinin “Azərbaycanın İraqın bərpası prosesində rolunu nədə görürsünüz” sualına cavab verən nazir müavini Volfovits deyib ki, Səddam rejimindən sonrakı mərhələdə təhlükəsizliyin təmin edilməsi və xüsusilə də dini ocaqların qorunması məsələləri həssaslıq tələb etdiyindən, belə yerlərin qorunmasında Azərbaycan kimi ölkələrin yardımı bizə çox kömək edər.
Məlum olduğu kimi, Azərbaycanın müdafiə naziri general-polkovnik Səfər Əbiyev amerikalı həmkarı Donald Ramsfeldin dəvəti ilə aprelin sonunda Vaşinqtona səfər edəcəkdir. Müdafiə və təhlükəsizlik sahəsində ikitərəfli əlaqələrin möhkəmləndirilməsi müzakirə ediləcək bu səfər çərçivəsində Azərbaycan qüvvələrinin İraqda dini ziyarətgahların qorunmasının təmin olunmasında iştirakı məsələsinə də toxunulacağı guman edilir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
