ABŞ Tayvanla imzaladığı ticarət müqaviləsi sayəsində 250 milyard dollar investisiya alacaq
Bakı, 16 yanvar, AZƏRTAC
Vaşinqton və Taybey arasında Tayvan mallarına tarif endirimlərini və ABŞ iqtisadiyyatına genişmiqyaslı investisiyaları nəzərdə tutan ticarət sazişi imzalanıb.
AZƏRTAC xəbər verir ki, “The Wall Street Journal” qəzetinin məlumatına görə, razılaşmaya əsasən, Vaşinqton Tayvan idxalına tətbiq olunan tarifləri hazırkı 20 faizdən 15 faizə endirəcək, dərman, təyyarələr üçün ehtiyat hissələri və nadir təbii resursların idxalından isə rüsum tutulmayacaq.
Bundan əlavə, Tayvan şirkətləri ABŞ-da yarımkeçirici istehsalına, eləcə də enerji sektoruna və süni intellekt texnologiyalarına 250 milyard dollar sərmayə yatıracaq. Buna dünyanın aparıcı çip istehsalçısı “Taiwan Semiconductor Manufacturing Company” şirkəti tərəfindən əvvəllər elan edilmiş 100 milyard dollarlıq sərmayə də daxildir. Həmin şirkət razılaşmanın bir hissəsi olaraq Arizonada bir neçə fabrik tikməyi planlaşdırır.
ABŞ-ın ticarət naziri Hovard Lutnik “CNBC” telekanalına bildirib ki, Ağ Evin məqsədi Tayvanın bütün təchizat zəncirlərinin və çip istehsalının 40 faizini ABŞ-a köçürməkdir.
“TrendForce” analitika şirkətinin məlumatına görə, 2021-ci ildə Tayvan dünyanın qabaqcıl çiplərinin 71 faizini, ABŞ isə yalnız 11 faizini istehsal edib. 2030-cu ilədək çip istehsalında Tayvanın payının 58 faizə enəcəyi, ABŞ-ın payının isə 22 faizə yüksələcəyi gözlənilir.
Bölmənin digər xəbərləri
