Xırdalan, 17 oktyabr, AZƏRTAC

2003-cü il oktyabrın 15-də keçirilən prezident seçkilərində xalqımız Ulu Öndər Heydər Əliyev siyasətinin davam etdirilməsinə, ölkədə sabitliyin qorunmasına, Azərbaycanın inkişafına - İlham Əliyevə səs verib. Bu siyasi kursa sadiqliyini nümayiş etdirən xalqımız Ümummilli Liderə sevgisini və inamını bir daha sübut edib. 20 il bundan əvvəl Azərbaycan Respublikasının Prezidenti seçilən İlham Əliyev ötən müddət ərzində dövlətimizi dünya üzrə ən qüdrətli, nüfuzlu ölkələr sırasına qaldıra bilib. Müzəffər Ali Baş Komandan İlham Əliyevin rəhbərliyi, qətiyyəti və siyasi iradəsi ilə xalqımız düşmən üzərində şanlı qələbə qazanıb və bununla da torpaqlarımız işğaldan azad olunaraq bölgədə sülhün tam bərqərar olması üçün yeni imkanlar yaranıb.

AZƏRTAC xəbər verir ki, bu fikirlər Abşeron rayonunda Ağsaqqallar Şurasının “Böyük yolun uğurlu davamı” mövzusunda keçirilən konfransında səslənib.

Tədbir iştirakçıları əvvəlcə Ümummilli Lider Heydər Əliyevin abidəsi önünə gül dəstələri düzərək, xatirəsini ehtiramla yad ediblər.

Xırdalan şəhərindəki Heydər Əliyev Mərkəzində baş tutan konfransda vətənimizin ərazi bütövlüyü uğrunda şəhid olanların və dünyasını dəyişən ağsaqqalların xatirəsi bir dəqiqəlik sükutla anılıb.

RİH başçısı Abdin Fərzəliyev çıxış edərək bildirib ki, bugünkü qüdrətli, güclü və qalib Azərbaycan Ümummilli Lider Heydər Əliyevin adı ilə sıx bağlıdır. Qeyd edilib ki, müasir Azərbaycanın qurucusu, dahi şəxsiyyət Heydər Əliyev ölkəmizin iqtisadi dirçəlişinin əsasını qoymuş, ictimai-siyasi və sosial həyatda tərəqqi yolunu müəyyənləşdirmişdir.

Prezident İlham Əliyevin rəhbərliyi ilə şanlı ordumuz tərəfindən həyata keçirilən uğurlu antiterror əməliyyatı nəticəsində Azərbaycan ərazisinin erməni terrorçularından təmizləndiyini vurğulayan Abdin Fərzəliyev qeyd edib ki, bu əməliyyatdan sonra vətənimizin ərazi bütövlüyü tam bərqərar oldu. Prezident İlham Əliyev tərəfindən qədim şəhərimiz olan Xankəndidə üçrəngli bayrağımızın qaldırılması bu ərazilərin kimə aid olmasını bir daha bütün dünyaya göstərdi.

Abdin Fərzəliyev ölkəmizdə aparılan uğurlu daxili və xarici siyasətdən bəhs edərək, ağsaqqalların ictimai həyatda tutduqları mühüm mövqedən, o cümlədən yerli ağsaqqalların Abşeron rayonunun həyatında oynadıqları əhəmiyyətli roldan söz açıb.

Sonra Respublika Ağsaqqallar Şurasının sədr müavini, Milli Məclisin deputatı Eldar İbrahimov çıxış edərək Azərbaycanın son 20 il ərzində əldə etdiyi mühüm nəticələrdən danışıb. Millət vəkili qeyd edib ki, ölkə iqtisadiyyatında qeyri-neft sektorunun çəkisinin artırılması ilə bağlı davamlı tədbirlər görülüb. Nəhəng infrastruktur layihələri həyata keçirilib.

Eldar İbrahimov Respublika Ağsaqqallar Şurasının qarşısında duran vəzifələr barədə ətraflı məlumat verərək bildirib ki, ölkəmizin ictimai-siyasi həyatında hər zaman yaxından iştirak edən ağsaqqallar cəmiyyətimizin, xüsusilə də gənclərimizin vətənpərvərlik, milli adət-ənənələrə bağlılıq ruhunda tərbiyəsi işinə xüsusi önəm verir, bu sahədə bilik və bacarıqlarını əsirgəmirlər. Ulu Öndər Heydər Əliyevin daxili və xarici siyasətini uğurla davam etdirən Prezident İlham Əliyevin və Birinci vitse-prezident Mehriban xanım Əliyevanın ağsaqqallara yüksək dəyər verdiyini bildirib.

Abşeron RİH yanında İctimai Şuranın sədri, Vətən müharibəsi şəhidi Elçin Həsənlinin anası Xatirə İsmayılova çıxış edərək Müzəffər Ali Baş Komandan İlham Əliyevin rəhbərliyi və düşünülmüş siyasəti sayəsində Azərbaycanın həm döyüş meydanında, həm də diplomatiya sahəsində qazandığı qələbələrdən danışıb.

Bildirilib ki, 2020-ci il sentyabrın 27-də başlanan Vətən müharibəsi Müzəffər Ali Baş Komandan İlham Əliyevin qətiyyəti, xalqın birliyi və ordumuzun gücü nəticəsində Zəfərlə sona çatıb. Müzəffər Ali Baş Komandan İlham Əliyev Prezident kimi 20 illik gərgin əməyinin nəticəsində Azərbaycanı ərazi bütövlüyünə qovuşdurub, xalqımızı dünyada qalib xalq kimi tanıdıb. Qeyd olunub ki, bu böyük qələbə uzun illər ərzində davam edən hazırlıq işlərinin, habelə dövlətin qüdrətinin artırılması istiqamətində atılan addımların nəticəsidir. Ərazi bütövlüyümüzün bərpa olunması Prezident İlham Əliyevin siyasətinin şah əsəridir. Bu Qələbə tarixdə əbədi qalacaq. Azərbaycan Silahlı Qüvvələri 44 gün ərzində düşmən ordusunu məhv edərək öz ərazi bütövlüyünü bərpa edib. Düşmən torpaqlarımızdan qovulub, ədalət və beynəlxalq hüquq bərpa olunub.

Müzəffər Ali Baş Komandan İlham Əliyevin Xankəndi, Xocalı və Xocavənddə bayrağımızı dalğalandırmasını qürur və iftixar hissi ilə izlədiyini vurğulayan Xatirə İsmayılova bununla da bütün şəhidlərimizin, Xocalı faciəsi qurbanlarının ruhlarının şad olduğunu bildirib.

Ceyranbatan qəsəbə Ağsaqqallar Şurasının sədri, Türk Dünyası Araşdırmaları Beynəlxalq Elmlər Akademiyasının fəxri professoru Sabir Tağıyev çıxışında qeyd edib ki, Prezident İlham Əliyevin dövlət siyasətinin ən mühüm cizgilərindən biri ölkənin bütün bölgələrinin tərəqqisinə səbəb olan regionların sosial-iqtisadi inkişafı konsepsiyasıdır. Regionların sosial-iqtisadi inkişafına dair həyata keçirilən dövlət proqramları sayəsində bölgələrdə inkişaf prosesləri sürətlənib, kənd təsərrüfatının müxtəlif sahələri ilə bağlı konkret proqramlar icra olunub.

Daha sonra toplantıda təşkilati məsələlər müzakirəyə qoyulub. Abşeron Rayon Ağsaqqallar Şurasının fəaliyyəti və gördüyü işlər müzakirə olunaraq qəbul edilib. Şuranın 15 nəfərdən ibarət İdarə Heyətinin üzvləri və Təftiş Komissiyası formalaşdırılıb. İdarə Heyətinin təşəbbüsü ilə namizədliyi irəli sürülmüş Nizami Zalov yekdilliklə Abşeron rayon Ağsaqqallar Şurasının sədri seçilib. Qeyd edək ki, Nizami Zalov Azərbaycan Respublikası Prezidentinin müvafiq sərəncamları ilə “Laçının azad olunmasına görə”, “Vətən müharibəsi iştirakçısı” və “Vətən uğrunda” medallarına layiq görülmüş, 11 aprel 2023-cü il tarixdə düşmən təxribatının qarşısını alarkən qəhrəmancasına şəhid olmuş gizir Vidadi Zalovun atasıdır.

Rayon Ağsaqqallar Şurasının yeni seçilmiş sədri Nizami Zalov çıxış edərək deyib ki, İlham Əliyev 2003-cü ildə Azərbaycan Respublikasının Prezidenti seçildiyi ilk gündən etibarən ölkəmizdə ordu quruculuğuna və onun inkişaf etdirilməsinə xüsusi diqqət və qayğı göstərib. Qısa müddət ərzində Azərbaycan Ordusu dünyanın ən güclü 50 ordusu sırasında yer alıb. Bunun üçün Azərbaycan Ordusunun döyüş qabiliyyətinin artırılması, silahlı qüvvələrin maddi-texniki bazasının möhkəmləndirilməsi sahəsində ardıcıl tədbirlər görülüb və son nəticədə də şanlı ordumuz düşməni döyüş meydanında diz çökdürdü.

O, rayon ağsaqqalları və şəhid ailələri adından bu qürur hissini onlara yaşatdığı üçün Prezidentə dərin təşəkkürünü bildirib.