ADNSU beynəlxalq reytinqlərdə mövqeyini gücləndirməyi hədəfləyir
Bakı, 19 may, AZƏRTAC
Azərbaycan Dövlət Neft və Sənaye Universiteti olaraq bu sərgidə iştirak etməkdən çox məmnunuq. Bu, bizim üçün olduqca maraqlı və faydalı təcrübədir.
Bu fikirləri AZƏRTAC-a açıqlamasında Azərbaycan Dövlət Neft və Sənaye Universitetinin (ADNSU) İctimaiyyətlə əlaqələr və marketinq şöbəsinin müdiri Xülya Sabirli deyib. O bildirib ki, universitet ikili diplom proqramları və beynəlxalq layihələri ilə tanınır: “ADNSU bakalavriat, magistratura və doktorantura səviyyələrində təhsil imkanları təqdim edir. Universitetimiz ölkədə məzunların işlə təmin olunma göstəricilərinə görə yüksək mövqedədir. Burada əcnəbi tələbələri universitetimiz barədə məlumatlandırırıq”.
X.Sabirli qeyd edib ki, sərgiyə maraq böyükdür: “Müxtəlif ölkələrdən gələn əcnəbilər, valideynlər və potensial tələbələr universitetimizə maraq göstərirlər. Biz onlara universitetin tarixi, təhsil proqramları, təqaüd imkanları və qəbul prosesi barədə ətraflı məlumat veririk. Müraciət qaydaları ilə bağlı sual verənlərin sayı kifayət qədər çoxdur”. Onun sözlərinə görə, son illərdə universitetdə əcnəbi tələbələrin sayı artmaqdadır və beynəlxalqlaşma prioritetlərdən biridir: “ADNSU olaraq beynəlxalq reytinqlərdə daha da yüksəlmək əsas hədəflərimizdəndir. Eyni zamanda, universitet hazırda tədqiqat universitetinə çevrilmək istiqamətində fəaliyyətini davam etdirir”.
Bölmənin digər xəbərləri
