Tramp: ABŞ-İran danışıqlarında müsbət irəliləyişlər var
Bakı, 19 may, AZƏRTAC
ABŞ-İran danışıqlarında müsbət irəliləyişlər var və Tehran bu dəfə razılığa gəlməyə daha yaxındır.
AZƏRTAC xəbər verir ki, bu barədə ABŞ Prezidenti Donald Tramp Ağ Evdə jurnalistlərə bildirib. Onun sözlərinə görə, bu dəfə danışıqlar əvvəlkilərdən "bir qədər fərqli" olub. Çünki Vaşinqton əvvəllər razılaşmanın yaxın olduğunu düşündüyü zaman danışıqlar dayandırılmışdı.
“Bu, çox müsbət irəliləyişdir, amma baxıb görəcəyik, nəyəsə gətirib çıxaracaqmı?” - deyə Amerika lideri vurğulayıb. O əlavə edib ki, İrana çərşənbə axşamı günü planlaşdırılan hücumları Körfəz ölkələrinin xahişi ilə təxirə salıb.
Bu arada Donald Tramp İranın nüvə proqramından imtina etməli olduğunu bir daha təkrarlayaraq deyib ki, “onlar bunu yazılı şəkildə bildirməlidirlər”.
Bölmənin digər xəbərləri
