Vladimir Putin: Rusiya-Çin dostluğu hər hansı bir ölkəyə qarşı yönəlməyib
Bakı, 19 may, AZƏRTAC
TASS agentliyinin mayın 19-da dərc etdiyi Rusiya Prezidenti Vladimir Putinin açıqlamasına görə, Moskva ilə Pekin arasındakı münasibətlər görünməmiş səviyyəyə çatıb.
AZƏRTAC xəbər verir ki, Putin Çinə səfərindən əvvəl iki ölkənin dostluğunun hər hansı bir ölkəyə qarşı yönəlmədiyini vurğulayıb.
RF Prezidenti Pekinə səfəri ərəfəsində videomüraciətində Rusiya və Çinin siyasət, iqtisadiyyat, müdafiə və humanitar mübadilə sahələrində əməkdaşlığı genişləndirməyə sadiq olduqlarını bildirib. “Dostluğumuz heç kimə qarşı yönəlməyib”, - deyə Putin bildirib və əlavə edib ki, iki ölkə arasındakı əlaqələr qarşılıqlı anlaşma və etimada, suverenlik və ərazi bütövlüyü də daxil olmaqla bir-birinin əsas maraqlarına dəstək üzərində qurulub.
Putin Pekinə “uzunmüddətli yaxşı dost” adlandırdığı Çinin Sədri Si Cinpinin dəvəti ilə səfər etdiyini bildirib və əlavə edib ki, müntəzəm yüksəksəviyyəli təmaslar ikitərəfli münasibətlərin dərinləşdirilməsi üçün vacibdir. O, iki ölkənin 25 il əvvəl mehriban qonşuluq, dostluq və əməkdaşlıq Müqaviləsini imzaladığı vaxtdan bəri həqiqi strateji münasibətlər və hərtərəfli tərəfdaşlığın olduğunu bildirib.
Rusiya Prezidenti, həmçinin iqtisadi əməkdaşlığı yüksək qiymətləndirib və bildirib ki, ikitərəfli ticarət dövriyyəsi 200 milyard dolları keçib və hesablaşmalar artıq demək olar ki, tamamilə rubl və yuanla həyata keçirilir. O, qarşılıqlı vizasız rejimin tətbiqini alqışlayıb və bunun turizmi, işgüzar səfərləri və insanlar arasında mübadiləni artıracağını bildirib.
Bölmənin digər xəbərləri
