Ağır atletika üzrə Azərbaycan birinciliyinə yekun vurulub
Bakı, 28 iyul, AZƏRTAC
İyulun 27-28-də Şüvəlan qəsəbəsindəki Ağır Atletika Akademiyasında keçirilən 15 və 17 yaşadək yeniyetmə oğlan və qızlar arasında Azərbaycan birinciliyinə yekun vurulub.
AZƏRTAC xəbər verir ki, yarışda ölkənin bütün şəhər və rayonlarından idman cəmiyyətləri, klubları, mərkəzləri, UGİM-lərini təmsil edən 150-yə yaxın gənc atlet iştirak edib.
Yaşı 15-ə qədər olan oğlanlarda çəkisi 89, 96 və 102 kiloqramadək olan atletlər qüvvələrini sınayıblar. 89 kiloqram çəki dərəcəsində toplam 216 kiloqram (96+120) nəticə ilə Hacı Əlimanov, 96 kiloqram çəki dərəcəsində toplam 130 kiloqram (60+70) nəticə ilə Sadiq Aslanlı, 102 kiloqram çəki dərəcəsində isə toplam 71 kiloqram (30+41) nəticə ilə Şamil Səlimli qalib adını qazanıblar.
Yaşı 17-yə qədər olan oğlanlar arasında ilk olaraq çəkisi 55 və 61 kiloqramadək olan atletlər mübarizəyə qoşulublar. 55 kiloqram çəki dərəcəsində toplam 174 kiloqram (76+98) nəticə ilə Nihad Həsənli, 61 kiloqram çəki dərəcəsində isə toplam 214 kiloqram (98+116) nəticə ilə Fuad Həsənov qızıl medala layiq görülüblər.
67 kiloqram çəki dərəcəsində toplam 260 kiloqram (115+145) nəticə ilə Rüstəm Qasımov, 73 kiloqramda isə toplam 237 kiloqram (105+132) nəticə ilə Nurlan Rəsulov fəxri kürsünün ən yüksək pilləsinə qalxıblar.
Körpücüyə son olaraq yaşı 17-yə qədər olan oğlanlar arasında çəkisi 81, 89, 96, 102 və +102 kiloqram olan atletlər çıxıblar. 81 kiloqramda toplam 267 kiloqram (115+142) nəticə ilə İsa Həsənli, 89 kiloqramda toplam 323 kiloqram (146+177) nəticə ilə Tarmenxan Babayev, 96 kiloqramda toplam 215 kiloqram (100+115) nəticə ilə Kənan Zamanov, 102 kiloqramda toplam 296 kiloqram (131+165) nəticə ilə Əli Şükürlü, +102 kiloqram çəki dərəcəsində isə toplam 265 kiloqram (120+145) nəticə ilə Rəhman Kazımov qızıl medal qazanıblar.
Bölmənin digər xəbərləri
