Aİ ABŞ-a qarşı 93 milyard avro dəyərində cavab tədbirləri planlaşdırır
Stokholm, 19 yanvar, Nərgiz Cəfərli, АZƏRTAC
Avropa İttifaqı ABŞ prezidenti Donald Trampın gömrük rüsumları ilə bağlı təhdidlərinə cavab olaraq, ABŞ-a qarşı 93 milyard avro dəyərində cavab tədbirləri tətbiq etməyi nəzərdən keçirir.
AZƏRTAC xəbər verir ki, mümkün tədbirlər sırasında Amerika şirkətlərinin Aİ-nin vahid bazarına çıxışının məhdudlaşdırılması da var.
Müzakirələr Aİ-nin 27 üzv ölkəsinin səfirlərinin Brüsseldə keçirdiyi fövqəladə görüşündən sonra aparılıb. Buna səbəb Trampın fevralın 1-dən etibarən səkkiz Avropa ölkəsinə qarşı 10 faiz gömrük rüsumu tətbiq ediləcəyi, iyunun 1-dən isə bu göstəricinin 25 faizə qaldırılacağı barədə açıqlamaları olub.
“Financial Times”in məlumatına görə, Aİ-də ümid edirlər ki, cavab tədbirlərinin hazırlanması ABŞ-la danışıqlarda, o cümlədən Davosda keçiriləcək Dünya İqtisadi Forumu çərçivəsində ittifaqın mövqelərini gücləndirəcək. Bununla yanaşı, Aİ ölkələrinin əksəriyyəti hələlik gərginliyin azaldılmasının və dialoqun tərəfdarıdır və ən sərt ticarət alətlərinin tətbiqini təxirə salır.
Bölmənin digər xəbərləri
