“Akademik yazıya müasir baxış” - təlim
Bakı, 16 mart, AZƏRTAC
Bakı Dövlət Universitetinin (BDU) Tələbə Elmi Cəmiyyətinin (TEC) təşkilatçılığı ilə 27 Mart – Azərbaycanda Elm Gününə həsr olunmuş tədbirlər çərçivəsində “Akademik yazıya müasir baxış” mövzusunda ikigünlük təlim proqramı başlayıb.
Bu barədə AZƏRTAC-a BDU-dan məlumat verilib.
BDU-nun Elmi fəaliyyətin təşkili və innovasiyalar mərkəzinin direktoru Farid Nağıyev akademik yazının müasir elmi fəaliyyətin əsas komponentlərindən biri olduğunu deyib. Qeyd edib ki, elmi biliklərin sistemli şəkildə ifadə olunması və beynəlxalq elmi ictimaiyyətə düzgün çatdırılması baxımından akademik yazı xüsusi əhəmiyyət kəsb edir.
BDU-nun Tədqiqat, inkişaf və innovasiyalar üzrə mükəmməllik mərkəzinin əməkdaşı və BDU TEC-nin sədri Zəhraxanım Rəhimova Tələbə Elmi Cəmiyyətinin 2025–2026-cı illər ərzində həyata keçirdiyi işlər barədə geniş məlumat verib.
Sonra Tələbə Elmi Cəmiyyətinin 2025-ci ildə fəaliyyətinə dair videoçarx nümayiş etdirilib.
Təlimin davamında BDU-nun Azərbaycan dilçiliyi kafedrasının müəllimi filologiya elmləri üzrə fəlsəfə doktoru Pərvin Eyvazov akademik yazının nəzəri və praktik aspektləri haqqında təqdimat edib. O, akademik mətnlərin hazırlanması zamanı diqqət yetirilməli olan əsas prinsiplər, elmi məqalənin mahiyyəti, strukturu, istifadə olunan terminologiya, elmi üslubun xüsusiyyətləri və mənbələrdən düzgün istifadə qaydaları barədə ətraflı məlumat verib. Bununla yanaşı, süni intellekt texnologiyalarının dilə və elmi yazı prosesinə təsiri məsələsinə toxunaraq bu alətlərdən düzgün və etik istifadə prinsiplərini izah edib.
Digər təlimçi - BDU ilə əməkdaşlıq çərçivəsində fəaliyyət göstərən “You Will Speak” ingilis dili kursunun baş müəllimi Aysel Əlili akademik yazı prosesində ingilis dilinin rolundan söz açıb. O, tələbələrin elmi məqalə və tədqiqat işlərində rəsmi və akademik ingilis dilindən düzgün istifadə qaydaları, akademik ifadə formaları və elmi mətnlərdə dil üslubu barədə praktiki tövsiyələr verib.
Qeyd edək ki, təlimin ikinci günü təbiət elmləri üzrə elmi yazıların hazırlanması haqqında olacaq.
Bölmənin digər xəbərləri
