ALMAN AZARKEŞLƏR ÖZ YIĞMA KOMANDASININ QƏLƏBƏ QAZANACAĞINA İNANMIRLAR

23.05.2006 [12:35]
Çap et
A⁺ A^-

AZƏRTAC Assoşieyted Press Agentliyinə istinadla xəbər verir ki, Allensbax şəhərindəki Tədqiqat İnstitutu almaniyalı futbol pərəstişkarlarının ölkə yığma komandasının qarşıdakı dünya çempionatında imkanlarını necə qiymətləndirdiyini öyrənmək üçün azarkeşlər arasında sorğu keçirmişdir.

Rəyi soruşulanların yalnız 6 faizi hesab edir ki, Yurgen Klinsmannın komandası çempionatda qalib gəlməyə qadirdir. Onların üçdə iki hissəsi əmindir ki, Almaniya futbolçuları yarımfinaladək irəliləyə bilməyəcəklər. İştirakçıların 7 faizinin fikrincə, milli yığma finala çıxacaq və burada uduzacaqdır. Onların 31 faizi bildirmişdir ki, yarımfinala çıxmaq Almaniya komandası üçün müvəffəqiyyət olacaqdır.

Xatırladaq ki, dünya çempionatinda Almaniya komandası “A” qrupunda Kosta-Rika, Ekvador və Polşa yığmaları ilə oynayacaqdır.