Almaniya miqrasiya siyasətini daha da sərtləşdirib
Berlin, 5 dekabr, AZƏRTAC
Bundestaqın bugünkü iclasında Almaniyanın miqrasiya siyasəti ilə bağlı qanuna bir sıra dəyişikliklər edilib.
AZƏRTAC xəbər verir ki, dəyişiklərə əsasən hökumətin miqrasiya siyasəti daha da sərtləşdirililib. Hökumət bundan sonra Bundesratın təsdiqinə ehtiyac olmadan ölkələri “təhlükəsiz mənşə ölkələri” kimi təsnif edə biləcək və bununla da həmin ölkələrdən gələn şəxslərin deportasiyası daha da asanlaşacaq. Hökumət bu addımla əsassız sığınacaq müraciətlərinin qarşısını almağı və Miqrasiya və Qaçqınlar İdarəsində (BAMF) prosedurların sürətləndirilməsini hədəfləyir. Yeni qaydalara görə, təhlükəsiz mənşə ölkələrindən gələnlərin ərizələri daha çox “açıq-aşkar əsassız” kimi qiymətləndiriləcək.
Qanun layihəsinə hökumətdə yer alan partiyalarla yanaşı, Almaniya üçün Alternativ Partiyası (AfD) dəstək verib, Yaşıllar və Sol partiya isə etiraz edib. Eyni paket çərçivəsində deportasiya edilə biləcək şəxslərə dövlət hesabına vəkil təyin edilməsi hüququnun ləğvi də planlaşdırılır. Bundan əlavə, vətəndaşlığa qəbul zamanı qəsdən yanlış məlumat verən şəxslər üçün on illik qadağa tətbiq ediləcək.
Bundestaqın bugünkü iclasında ölkədə uzun müddət müzakirə olunan hərbi xidmət və pensiya islahatları haqqında qanun layihələri də səsə qoyularaq qəbul olunub.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
