Almaniyada elektromobillər üçün dövlət dəstəyi yenidən tətbiq olunur
Berlin, 16 yanvar, AZƏRTAC
Almaniyada fiziki şəxslər üçün elektromobillərin alınmasına dövlət dəstəyi yenidən tətbiq olunur.
AZƏRTAC “Bild” qəzetinə istinadla xəbər verir ki, ətraf mühit naziri Karsten Şnayderin təqdim etdiyi proqram 2026-cı il yanvarın 1-dən etibarən tətbiq olunacaq və əsasən aşağı-orta gəlirli vətəndaşlara yönələcək. Onlayn müraciət portalının may ayında istifadəyə verilməsi planlaşdırılır.
Yeni elektromobil və ya “plug-in” hibrid avtomobil qeydiyyatdan keçirən, eyni zamanda, müəyyən edilmiş gəlir həddindən aşağı qazancı olan şəxslər subsidiyaya müraciət edə biləcəklər. Dəstəyin məbləği avtomobilin növündən, ailənin gəlirindən və üzvlərin sayından asılı olaraq 1500 avrodan 6000 avroya qədər dəyişəcək. Əsas şərt avtomobilin yeni olmasıdır.
Batareyalı elektromobillər və hidrogenlə işləyən nəqliyyat vasitələri üçün əsas subsidiya 3000 avro, “plug-in” hibridlər üçün isə 1500 avro təşkil edir. Lakin “plug-in” hibridlərin 1 kilometrə 50 qramdan artıq karbon qazı buraxmaması və ya minimum 80 kilometr elektrik məsafəsinə malik olması tələb olunur. Uşaqlı ailələr üçün əlavə bonusların verilməsi də nəzərdə tutulur.
Federal hökumət proqram üçün ümumilikdə 3 milyard avro vəsait ayırıb. K.Şnayder bu məbləğin təxminən 800 min avtomobil üçün kifayət edəcəyini bildirib. O, proqramın elektromobillərdən istifadənin artmasına və Almaniya avtomobil sənayesinin güclənməsinə mühüm töhfə verəcəyini qeyd edib.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
