Almaniyadakı Azərbaycan diaspor təşkilatlarının rəhbərləri və fəalları ilə görüş keçirilmişdir
Bakı, 31 may (AZƏRTAC). Diasporla İş üzrə Dövlət Komitəsinin Almaniyada səfərdə olan nümayəndə heyəti Azərbaycan diaspor təşkilatlarının rəhbərləri və fəalları ilə görüş keçirmişdir.
Komitədən AZƏRTAC-a bildirmişlər ki, Frankfurt şəhərində keçirilən görüşdə diaspor təşkilatlarının rəhbərləri və fəallarından Samira Patzer-İsmailova, Başar Kömür, Etibar Qəniyev, Ağahüseyn Babayev, Təranə Tağıyeva, Tofiq Qarayev, Elnur Rixter və digərləri iştirak etmişlər.
Toplantıda 2014-cü ildə görülmüş işlərə dair qısa hesabat dinlənilmiş, növbəti yarım il, həmçinin 2015-ci il üçün qarşıda duran vəzifələr, eləcə də problemlər müzakirə edilmiş, təkliflər irəli sürülmüşdür.
Görüşdə əsas diqqət erməni diasporunun qondarma erməni soyqırımının 100 illiyi ilə bağlı Avropa ölkələrindəki fəaliyyətinə qarşı mübarizənin aparılmasına və Avropada yaşayan azərbaycanlıların ictimai-siyasi həyatda iştirakının təmin olunması sahəsindəki problemlərə ayrılmışdır. Toplantıda, həmçinin 2015-ci ildə Bakıda keçiriləcək I Avropa Oyunları zamanı Azərbaycanın beynəlxalq aləmdə turizm potensialının, iqtisadiyyatının və zəngin mədəni irsinin təbliği məqsədilə Avropada fəaliyyət göstərən diaspor təşkilatları tərəfindən müxtəlif kampaniyaların təşkili ilə bağlı geniş fikir mübadiləsi aparılmışdır.
Dövlət Komitəsinin şöbə müdiri İlham Məmmədov bildirmişdir ki, qondarma erməni soyqırımının 100 illiyi və I Avropa Oyunları ilə bağlı gələn il Azərbaycan diaspor təşkilatlarının üzərinə böyük vəzifə düşür. Qondarma erməni soyqırımı ilə bağlı erməni diasporunun təbliğatına qarşı Azərbaycan diaspor təşkilatları əks tədbirlər keçirməli, eyni zamanda, Azərbaycanı sevməyən qüvvələrin I Avropa Oyunları zamanı ölkəmizə qarşı gözlənilən qara piar kampaniyasının qarşısını almalıdırlar.
Dövlət Komitəsinin Aparat rəhbəri Nəriman Qurbanov isə 2015-ci il qondarma erməni soyqırımının 100 illiyi ilə əlaqədar Azərbaycan və Türkiyə diaspor təşkilatlarının birgə fəaliyyətinin vacibliyindən danışmışdır. O demişdir ki, bu istiqamətdə həyata keçirilən tədbirlər çərçivəsində dörd ölkənin - Azərbaycan, Türkiyə, Qazaxıstan və Qırğızıstanın daxil olduğu Türkdilli Ölkələrin Əməkdaşlıq Şurasının regional əlaqələndirmə mərkəzləri yaradılır. Yaxın günlərdə Almaniya və Ukraynada, daha sonra isə Fransa, ABŞ da daxil olmaqla 8 ölkədə bu mərkəzlərin yaradılması nəzərdə tutulmuşdur.
Avropa Azərbaycanlıları Konqresinin prezidenti Samirə Patzer-İsmailova bəzi Avropa ölkələrində Azərbaycana qarşı ikili standartların müşahidə olunduğunu bildirmişdir. O, belə halların qarşısını almaq üçün Azərbaycan diaspor təşkilatlarının akademik fəaliyyətinin gücləndirməsinin vacib olduğunu demişdir. Onun fikrincə, diaspor təşkilatları öz işini elə qurmalıdır ki, alman cəmiyyəti Azərbaycan haqqında düzgün informasiya ala bilsin.
Mayns-Azərbaycan Cəmiyyətinin sədri Başar Kömür Azərbaycan diaspor təşkilatlarının siyasi partiyalarda iştirakını vacib saymış və təşkilatları bu istiqamətdə fəal iş görməyə çağırmışdır.
Alman-Azərbaycan Mədəni Əlaqələr Cəmiyyətinin sədri Rasim Sadıqov isə almanların Azərbaycana köçürülməsinin 195 illiyi ilə əlaqədar hər iki ölkənin üç şəhərində mədəni kütləvi tədbirlər keçirməklə bu tarixi geniş şəkildə qeyd etmək təklifini irəli sürmüşdür. Rasim Sadıqov bildirmişdir ki, bu tədbirlər xalqlar və ölkələr arasında münasibətləri möhkəmləndirməkdə səmərəli ola bilər.
Toplantıda çıxış edən Alman-Azərbaycan Gənclər Birliyinin sədri Elnur Rixter azərbaycanlı gənclərin diaspor fəaliyyətindən və onların qarşılaşdığı problemlərdən, Almaniyada Xəzər Cəmiyyətinin sədri Etibar Qəniyev isə əsasən yerli media ilə əlaqələrin gücləndirilməsinin vacibliyindən danışmışdır.
Diaspor təşkilatının fəalı Kəmalə İsgəndərova isə şagird mübadiləsinin reallaşdırılmasını təklif etmişdir. O demişdir ki, Frankfurtda çalışdığı beynəlmiləl məktəbin şagird və müəllimlərindən ibarət bir qrupun Azərbaycana iki-üç həftəlik səfərinin təşkili ölkəmizin təbliği baxımından faydalı və əhəmiyyətli ola bilər. K.İsgəndərova bu layihənin həyata keçirilməsində iş adamlarını da maliyyə dəstəyi göstərməyə çağırmışdır.
Almaniyadakı diaspor fəallarının problemlərini, gələcək fəaliyyətlə bağlı rəy və təkliflərini dinləyən Dövlət Komitəsinin rəhbər nümayəndələri toplantıda səslənən bütün məsələlərin diqqətdə saxlanılacağını, Komitənin səlahiyyətində olmayan problemlərlə bağlı isə ən qısa zamanda müvafiq qurumlara müraciət ediləcəyini bildirmişlər. Həmçinin Almaniyadakı Azərbaycan diasporunu narahat edən bütün məsələlərin birbaşa müvafiq qurumlara çatdırılması üçün yaxın günlərdə həmin qurumların nümayəndələrinin də iştirakı ilə onlayn müzakirələrin təşkili qərara alınmışdır.
Bölmənin digər xəbərləri
