Altı beynəlxalq aviaşirkət Tallinə uçuşları müvəqqəti dayandırıb
Tallin, 5 noyabr, AZƏRTAC
Yeddi aviaşirkət Tallin istiqamətində müntəzəm uçuşlar həyata keçirirdi, lakin oktyabr ayının sonundan başlayaraq “Wizzair”, “Norwegian”, “EasyJet”, “Aeroflot”, “Belavia” və “Turkish Airlines” şirkətləri Estoniya istiqamətində uçuşları müvəqqəti dayandırıb.
Bundan əlavə, oktyabrın sonunda qış uçuş cədvəli qüvvəyə minib. Bu müddətdə, adətən yay mövsümü ilə müqayisədə uçuşlara tələbatın az olması müşahidə edilir. Doğrudur, ilin sonunda Norveçin Bergen və Tronheym şəhərlərinə yeni birbaşa aviareyslərin və Avstriyanın Salzburq şəhərinə mövsümi reyslərin açılması da gözlənilir. Bütün bunlar koronavirusla bağlı vəziyyətin yenidən nəzarətə alınması şərti ilə həyata keçiriləcək.
AZƏRTAC xəbər verir ki, bu sözləri Tallin hava limanının ticarət işləri üzrə rəhbəri Eero Pyarqmyae deyib. O bildirib ki, Avropada koronavirusa yoluxanların sayında kəskin artımın müşahidə olunması aviadaşımalara da öz təsirini göstərməkdədir.
Tallin hava limanının məlumatına görə, Baltikyanı bölgədə ən iri aviaşirkət olan “AirBaltic” oktyabr ayında Estoniyanın əsas hava limanında sərnişinlərin 31 faizinə xidmət göstərib.
Yerli “Ärileht” nəşri yazır ki, oktyabrda Tallin hava limanı 35 min 25 sərnişinə xidmət göstərib ki, bu da ötən ilin müvafiq ayındakı göstəricinin 11 faizini təşkil edib.
Asiman Əsədov
AZƏRTAC-ın xüsusi müxbiri
Tallin
Bölmənin digər xəbərləri
