AMEA-nın Şəki Regional Elmi Mərkəzi Elmi şurasının növbəti iclası
Bakı, 18 sentyabr, AZƏRTAC
Azərbaycan Milli Elmlər Akademiyasının (AMEA) Şəki Regional Elmi Mərkəzinin (ŞREM) Elmi şurasının növbəti iclası olub. İclasda Şəki REM-in direktoru dosent Yusif Şükürlü Elmi şuranın gündəliyində olan məsələləri diqqətə çatdırıb.
Bu barədə AZƏRTAC-a AMEA-dan məlumat verilib. Bildirilib ki, “Heydər Əliyev İli” çərçivəsində Şəki REM tərəfindən nəşrə hazırlanan “Görkəmli dövlət xadimi Heydər Əliyev və Şəki” kitabının ilkin variantı müzakirə olunub.
Tarix, arxeologiya və epiqrafika şöbəsinin baş elmi işçisi, professor Firədun İbrahimov kitabda yer alan fəsil və paraqraflar haqqında məlumat verib. O, Ümummilli Lider Heydər Əliyevin ölkəmizə rəhbərliyinin ilk illərindən ipəkçiliyin inkişafına xüsusi diqqət yetirdiyini vurğulayıb. F.İbrahimov qeyd edilən bu və ya digər məsələlərin nəşrdə əks olunduğunu diqqətə çatdırıb.
Elmi-texniki informasiya şöbəsinin baş mütəxəssisi Günel Musayeva və Sənədlərlə iş şöbəsinin müdiri Namiq Abdurahmanov “Şəki fəhləsi”, “İpəkçi” qəzetləri və arxiv materialları əsasında məlumatların əldə olunması, selektiv seçmə və sistemləşdirmə məsələləri ilə bağlı çıxış ediblər.
G.Musayeva, həmçinin Şəki REM-in 50 illik yubileyi ilə bağlı nəşrə hazırlanan kitablardan bəhs edib. Baş mütəxəssis bildirib ki, bu il ərzində Şəki REM-də 6 kitabın çapı nəzərdə tutulub, bunlardan ikisi artıq çapdan çıxıb, digər 4 kitab isə bu ilin sonunadək nəşr olunacaq.
Ədəbi-mədəni mühit, folklor və etnoqrafiya şöbəsinin aparıcı elmi işçisi dosent Kamil Adışirinov “Şəki fəhləsi”, İpəkçi” qəzetləri və arxiv materiallarından əldə olunan məlumatların sistemləşdirildiyini, elmi təhlilə cəlb olunduğunu və oktyabr ayının sonuna təhvil veriləcəyini diqqətə çatdırıb.
Mərkəzin Landşaftşünaslıq şöbəsinin rəhbəri Hüseyn Mustafabəyli “Azərbaycanın Qarabağ və Şərqi Zəngəzur bölgələrinin təbii resurslarının landşaft-diaqnostik xüsusiyyətləri” kitabı haqqında məlumat verib. Bildirilib ki, nəşrin yazılmasında bölgələrin iqlim, relyef, hidroloji, torpaq və bitki örtüyünün səciyyəvi xüsusiyyətləri nəzərə alınıb və kitab 2023-cü ilin sonunadək elmi ictimaiyyətə təqdim olunacaq.
İctimaiyyətlə əlaqələr şöbəsinin rəhbəri Reyhan Mənəfova Ulu Öndər Heydər Əliyevin 100 illik yubileyi ilə əlaqədar sentyabr ayının sonlarında “Heydər Əliyev və azərbaycançılıq” ideyalarının daha dərindən öyrənilməsi” mövzusunda tədbirin təşkil ediləcəyini diqqətə çatdırıb, tədbirin təşkili barədə müvafiq qərar qəbul edilib.
Bölmənin digər xəbərləri
