AMERİKALI FİZİK VAMPİRLƏRİN HEÇ VAXT MÖVCUD OLMADIĞINI BİLDİRİR
AZƏRTAC İTAR-TASS-a istinadla xəbər verir ki, Mərkəzi Florida Universitetinin fizika professoru Kostas Eftimiu riyazi yolla sübut etmişdir ki, vampirlər mövcud olmayıblar. Əfsanəyə görə, vampirlər insan qanı ilə qidalanırlar və onların qurbanlarının özləri vampirə çevrilirlər. Eftimiu ona əsaslanmışdır ki, 1600-cü il yanvarın 1-dək Yer üzündə 536.870.911 nəfər yaşayırdı. Əgər güman etsək ki, ən birinci vampir elə o gün meydana çıxıb və ayda bir nəfərə hücum edibsə, onda 1600-cü il fevralın 1-də Yer üzündə artıq iki qaniçən, daha bir aydan sonra dörd qaniçən olardı və sair.
Nəticədə, professorun hesablamalarına görə, cəmi iki il yarımdan sonra Yer üzündə qanını içmək üçün heç olmasa bir adam tapmaq ümidi ilə yalnız vampirlər dolaşardı. Eftimiu “LayvSayens” internet nəşrinə müsahibəsində demişdir: “Hətta uşaqların doğulması hesabına əhali hər ay ikiqat artsaydı belə, insanlar bu cür şəraitdə sağ qala bilməzdilər”.
Bölmənin digər xəbərləri
