Ankara-Bakı-Ağdam marşrutu üzrə piyada yürüş edən Qələndər Bayramlı Ağdaşa çatmışdır
Ağdaş, 10 may (AZƏRTAC). Bütün dünyanın diqqətini Xocalı soyqırımına cəlb etmək məqsədi ilə martın 21-də Ankaradan Bakıya, oradan da Ağdama yürüşə başlayan Azərbaycan əsilli Türkiyə vətəndaşı Qələndər Bayramlı Ağdaş rayonuna çatmışdır.
Ankaradan-Naxçıvanadək piyada və oradan təyyarə ilə Bakıya gələn 58 yaşlı Qələndər Bayramlı paytaxtdan Ağdam istiqamətinə piyada yürüşünü davam etdirir.
Ağdaş Özəl Türk Liseyində dincəlmək üçün dayanan Qələndər Bayramlı AZƏRTAC-a bildirmişdir ki, bu yürüşə çıxmaqda əsas məqsədinin ermənilərin Xocalıda törətdikləri qətliamları bütün dünyaya çatdırmaq olduğunu qeyd etmişdir. Qələndər Bayramlı əsl Azərbaycan sevdalısıdır. Bunu qızlarına qoyduğu adlardan da bilmək olur. İki qız atası olan Qələndər Bayramlının qızlarından birinin adı Azər, digərinin adı isə Baycandır.
Qələndər Bayramlı qeyd etmişdir ki, 1992-ci il fevralın 26-da Xocalıda ermənilər tərəfindən baş vermiş qətliam illər boyu vicdanımı sızladırdı. “Bu soyqırımı məsələsini bütün dünyaya çatdırmaq istəyirdim. Amma mənim qəzetlərdə, televiziyalarda çıxış etmək imkanım yox idi. Ona görə də mən öz bacardığımı etdim. Yürüşə çıxmaq qərarına gəldim. Bu yolla hamının diqqətini cəlb edəcəyimi düşündüm”.
Qələndər Bayramlı onu da demişdir ki, türklər heç vaxt soyqırımına yol verməmişlər, soyqırımını ermənilər törətmişlər: “Bunu bütün dünyaya çatdırmaq üçün 2 min 800 kilometr yolu piyada gedəcəyimi qərarlaşdırmışdım. Yola çıxdıqdan sonra üzərimdə olan Azərbaycan və Türkiyənin dövlət bayraqları sanki mənə güc verirdi”.
Gün ərzində ən azı 35 kilometr yol getdiyini bildirən Qələndər Bayramlı gecələr təhlükəsizliklə bağlı yola çıxmadığını söyləmişdir. “Mənim hansı məqsədlə yola çıxmağım Türkiyədə qəzetlərdə və televiziya kanallarında yayımlanmışdı. Keçdiyim şəhərlərdə məni hörmətlə qarşılayırdılar. Təkcə Türkiyə-İran sərhədində problem yaşandı. İranda mənim təhlükəsizliyimə təminat vermədilər. Ona görə də Naxçıvana piyada gəldim, oradan da Bakıya təyyarə ilə gəldim”.
Bakı-Şamaxı-Ağsu-Göyçay-Ağdaş marşrutu ilə hərəkət edən qonaq yolda azərbaycanlıların ona çox hörmətlə yanaşdıqlarını söyləmişdir. Hələ cibindən pulunun yarısını ona verməyi təklif edənlərin də olduğunu söyləyən Qələndər Bayramlı azərbaycanlıların bu səmimiyyətinin də ona güc və əzm verdiyini qeyd etmişdir. “İnşallah, məqsədimə çatmağa az qalıb. Mən bu yürüşü Xocalıda bitirməyi qərara almışdım. Amma Bakıda ora getməyin çətin olduğunu söylədilər. Ona görə də indi istiqamətim Ağdama doğrudur”.
Bu yürüşdə Qələndər Bayramlını heç kim müşayiət etmir. O, gedəcəyi marşrutu əlində olan xəritə vasitəsilə müəyyən edir. Qələndər Bayramlı mayın 10-da Ağdaş-Yevlax-Bərdə-Ağdam marşrutu üzrə yürüşünə davam etmişdir.
Bölmənin digər xəbərləri
