AQRAR BÖLMƏ İQTİSADİYYATIN APARICI SAHƏSİNİ TƏŞKİL EDİR
Ağsu, 26 yanvar (AZƏRTAC). Ötən il Ağsu rayonunda ümumi daxili məhsul istehsalı 71 milyon 664 min manat təşkil etmişdir. Bunun 45 milyon 311 min manatı və ya 63,2 faizi aqrar bölmənin payına düşür.
Ümumiyyətlə, bölgədə kənd təsərrüfatı iqtisadiyyatın aparıcı sahəsi olaraq qalır. İstər bitkiçilik, istərsə də heyvandarlıq məhsulları istehsalı ildən-ilə artır. Keçən il təkcə taxıl istehsalı rekord səviyyəyə - 92,6 min tona çatmışdır. Təsadüfi deyil ki, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda Ağsuda taxılçılığın, habelə pambıqçılığın dəstəklənməsinin davam etdirilməsi nəzərdə tutulmuşdur. Yerli fermerlər taxılçılıqda olduğu kimi, pambıqçılıq üçün də ciddi dəstək gözləyirlər. Qeyd edək ki, Ağsu pambıqçılıq üçün yaxşı ənənəsi olan bölgədir. Təəssüf ki, son illərdə torpaq mülkiyyətçilərinin bu sahəyə marağı tamamilə azalmışdır. Yerli mütəxəssislər buna səbəb kimi iki mühüm amili qeyd edirlər. Birincisi, yay aylarında rayonda ciddi su qıtlığı hökm sürürdü. Pambıq bitkisi də vegetasiya dövründə 4-5 dəfə suvarılmalıdır və təbii ki, bunun üçün rayonda su çatışmırdı.
Prezident İlham Əliyevin 2006-cı il iyunun 30-da rayona səfəri zamanı qaldırılan bu problem artıq öz həllini tapmışdır. Belə ki, səfərdən az sonra Prezidentin Ehtiyat Fondundan ayrılan vəsait hesabına yuxarı Şirvan kanalının Ağsu maşın qolu əsaslı təmir edilmiş, Girdimançaydakı nasos stansiyası işə salınmış və kanal yenidən istismara buraxılmışdır.
Lakin, əkinçiləri narahat edən daha bir məsələ pambıqçılığa marağı azaltmışdır. Bu, istehsal edilən məhsulun satınalma qiymətinin onları qane etməməsi ilə əlaqədardır. Son vaxtlar bu, təbii ki, prioritet bir məsələ kimi gündəmdədir və yəqin ki, yaxın vaxtlarda öz həllini tapacaqdır.
Bölmənin digər xəbərləri
