ARDNŞ-İN EKOLOGİYA İDARƏSİ VƏ AMEA-NIN RADİASİYA PROBLEMLƏRİ İNSTİTUTU BİRGƏ ƏMƏKDAŞLIĞI GENİŞLƏNDİRİR
Bakı, 30 iyul (AZƏRTAC). ARDNŞ-in Ekologiya İdarəsi ilə AMEA-nın Radiasiya Problemləri İnstitutu qarşılıqlı razılaşmaya əsasən Abşeron yarımadasının neft və neft məhsulları ilə çirklənmiş sahələrində dozimetrik ölçülərin aparılması və torpaqda onurğasızların sayının və növ tərkibinin öyrənilməsi istiqamətində birgə elmi tədqiqat işləri həyata keçirir.
ARDNŞ-in mətbuat xidmətindən AZƏRTAC-a verilən məlumata görə, “Azərneft” İB-nin “Bibiheybətneft” və Ə.Əmirov adına NQÇİ-nin ərazilərindən götürülmüş nümunələrdə onurğasızlardan mezafauna üzrə 6, mikrofauna üzrə isə 2 dəstənin nümayəndələri aşkar edilmişdir. Tədqiqat işlərinin davamı olaraq bu günlərdə ARNDŞ-in Ekologiya İdarəsinin və Radiasiya Problemləri İnstitutunun əməkdaşları tərəfindən “Suraxanı Oil Company” ərazisində neftlə çirklənmiş ərazilərdə dozimetrik ölçmə işləri aparılmış və torpaq nümunələri götürülmüşdür.
Neftlə çirklənmiş torpaq nümunələri laboratoriya şəraitində tədqiq olunacaq, ərazidəki onurğasızların sayı və növ tərkibi öyrəniləcəkdir. Tədqiqat işlərinin nəticələrinə əsasən neftlə çirklənmiş ərazilərdə torpaqların bioloji rekultivasiyası üçün təkliflərin hazırlanması nəzərdə tutulur.
Bölmənin digər xəbərləri
