Asiya İnfrastruktur İnvestisiya Bankı COVID-19 böhranına qarşı fondunu 2 dəfə artırıb
Pekin, 22 aprel, AZƏRTAC
Azərbaycanın təsisçi-üzv olduğu Asiya İnfrastruktur İnvestisiya Bankı (AIIB) COVID-19 böhranına qarşı fondunu 2 dəfə artıraraq 10 milyard ABŞ dollarına çatdırıb.
Bankın Pekindəki mənzil-qərargahından AZƏRTAC-a bildiriblər ki, dövlət və özəl sektordan olan müştərilərin pandemiya ilə əlaqədar artan tələbatını ödəmək üçün belə bir qərar qəbul edilib. Çünki müraciətlər bankın daha əvvəl nəzərdə tutduğu 5 milyardlıq rəqəmdən yuxarı olub.
AIIB müraciətləri təhlil edərək, fonddan əsasən 3 sahə üzrə vəsait ayrılmasını məqsədəuyğun hesab edib. Bunlar səhiyyə infrastrukturunun yaradılması və pandemiyaya hazırlığın təmin edilməsi ilə səhiyyənin yüklənməsinin yüngülləşdirilməsinə yardım göstərilməsi, işçi kapital və likvidlik çatışmazlığını həll etmək üçün maliyyə təşkilatları vasitəsilə likvidliyin dəstəklənməsi, hökumətlərin COVID-19-un humanitar və maliyyə təsirlərinin aradan qaldırılmasına diqqət yetirə bilməsi üçün çoxtərəfli inkişaf bankları ilə tərəfdaşlıq şəraitində maliyyə dəstəyinin göstərilməsidir.
Bankın prezidenti Cin Liçun deyib ki, AIIB həssas iqtisadiyyatları olan ölkələrə dəstək olmaq üçün digər beynəlxalq maliyyə qurumları ilə sıx əməkdaşlıq edir. Hazırda bir neçə layihə, o cümlədən Hindistanın milli səhiyyə sisteminin inkişafı ilə bağlı 500 milyon dollarlıq layihənin maliyyələşdiirlməsi ilə bağlı tərəfdaş banklarla müzakirələr aparılır. Bundan başqa, Türkiyə pandemiyanın iqtisadiyyata təsirlərinin aradan qaldırılmasına dəstək üçün özünün iki inkişaf bankına 500 milyon dollar məbləğində kredit xəttinin ayrılması barədə sorğu göndərib. İndoneziya isə xəstəxanaların hazırlıq vəziyyətini və test imkanlarını yüksəltmək üçün 250 milyon dollar kredit istəyib.
AIIB COVID-19 böhranına qarşı fondundan indiyədək Çinə ictimai səhiyyə infrastrukturunun müasirləşdirilməsinə və infeksiyanın yayılması şəraitində təcili avadanlıq təminatının həlli üçün 355 milyon dollar kredit ayırıb.
Qeyd edək ki, 2016-cı ilin yanvarında Azərbaycan da daxil olmaqla 57 təsisçi-üzv ölkə tərəfindən yaradılan bank 100 milyard ABŞ dolları nizamnamə kapitalı ilə Asiyada enerji, nəqliyyat, şəhərsalma, su təchizatı, logistika, telekommunikasiya, kənd təsərrüfatı, ətraf mühit və digər sahələr üzrə infrastruktur layihələri maliyyələşdirir. AİİB fəaliyyətə başladığı vaxtdan indiyədək Azərbaycan da daxil olmaqla 70 layihəyə, ümumilikdə, 13,77 milyard dollar kredit ayırıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
