SİYASƏT
AŞPA-NIN MONİTORİNQ KOMİTƏSİNİN İCLASINDA
Sentyabrın 10-da Parisdə Avropa Şurası Parlament Assambleyasının Monitorinq komitəsinin iclası keçirilmişdir. İclasda Azərbaycanın Avropa Şurası qarşısında götürdüyü öhdəlikləri yerinə yetirməsi, avqustun 24-də respublikamızda keçirilmiş referendumun nəticələri, Ermənistan-Azərbaycan, Dağlıq Qarabağ münaqişəsi ilə bağlı məsələlər də müzakirə olunmuşdur.
Milli Məclisin AŞPA-dakı nümayəndə heyətinin üzvü Səməd Seyidov AZƏRTAC-ın müxbirinə bu barədə məlumat verərək demişdir: Monitorinq komitəsinin Azərbaycan üzrə məruzəçiləri A.Qross və M.Kassan təqdim etdikləri məruzədə ölkəmizin AŞ qarşısında götürdüyü öhdəlikləri yerinə yetirməsi, son vaxtlar respublikamızda gedən proseslər barədə ətraflı məlumat vermişlər. Əlamətdar haldır ki, Azərbaycana qarşı həmişə qərəzli mövqe tutmuş A.Qross bu dəfə müzakirə olunan məsələlərə obyektiv münasibət bəsləmiş, əsl həqiqətləri açıqlamışdır. Diqqəti cəlb edən cəhəti ondan ibarətdir ki, məruzədə Ermənistan-Azərbaycan, Dağlıq Qarabağ münaqişəsi xüsusi vurğulanmış, Ermənistanın təcavüzkar siyasəti pislənilmiş, ölkəmizin ərazisinin bir hissəsinin işğal edilməsi, Azərbaycanda 1 milyon qaçqın və məcburi köçkünün olması Avropanı narahat edən və ciddi təhlükə doğuran problem kimi nəzərə çarpdırılmış və onun beynəlxalq qanunlara uyğun olaraq tezliklə həlli tövsiyə edilmişdir.
İclasda Ermənistan nümayəndə heyətinin üzvü A.Rustamyanın qeyri-obyektiv və qərəzli çıxışı isə heç bir təsir doğurmamışdır.
S.Seyidov onu da əlavə etmişdir ki, iclasda diqqəti cəlb edən digər məqamlar da var idi. Ölkəmizdə bəzi müxalifət yönümlü mətbuatda Monitorinq komitəsi tərəfindən Azərbaycana qarşı guya sanksiyalar tətbiq olunacağı, hətta Azərbaycanın AŞ kimi nüfuzlu beynəlxalq təşkilatın üzvlüyündən çıxarılacağı barədə xəbərlər dərc olunmuşdur. Komitənin iclası isə bir daha göstərdi ki, respublikamızla Avropa Şurası arasında konstruktiv əməkdaşlıq davam edir.
Monitorinq komitəsinə təqdim edilmiş məruzədə avqustun 24-də ölkəmizdə keçirilmiş referendumun nəticələri Avropa dəyərlərinin Azərbaycanda tətbiq olunması kimi açıqlanmış, 251 seçki məntəqəsində səsvermənin nəticələrinin Mərkəzi Seçki Komissiyası tərəfindən rəsmən ləğv edilməsi faktı müsbət qiymətləndirilmişdir. Referendum ərəfəsində Azərbaycanda iqtidar və müxalifət nümayəndələri arasında diskussiyaların respublika televiziyası ilə birbaşa yayımlanması da müsbət hal kimi vurğulanmışdır.
S.Seyidov, ümumiyyətlə, müzakirələrin çox konstruktiv keçdiyini bildirərək demişdir ki, Azərbaycan üzrə məruzənin AŞPA-nın bu ayın sonunda toplanacaq sessiyasına çıxarılması tövsiyə edilmişdir.
Əsgər Əliyev
AZƏRTAC-ın xüsusi müxbiri
Paris