Astanada “RES 2026 EXPO” beynəlxalq sərgisi başa çatıb
Astana, 24 aprel, AZƏRTAC
Astanada “RES 2026 EXPO” beynəlxalq sərgisi başa çatıb. Tədbir region ölkələrini və tərəfdaşları siyasi bəyannamələrdən praktiki fəaliyyətə keçmək üçün bir araya gətirib.
Azərbaycan Dövlət İnformasiya Agentliyi (AZƏRTAC) “RES 2026 EXPO” beynəlxalq sərgisinin rəsmi media tərəfdaşı qismində çıxış edib.
AZƏRTAC xəbər verir ki, tədbir zamanı 30 ölkədən 247 şirkət 120 pavilyonda öz nailiyyətlərini təqdim edib.
Sərginin yekunlarına dair 2,3 milyard dollardan çox dəyəri olan 17 sənəd imzalanıb. İnvestisiyaların əsas hissəsi bərpaolunan enerji mənbələrinin inkişafına, tullantıların idarə olunmasına, sənayedə karbonsuzlaşdırma layihələrinə və gübrə istehsalına yönəlib.
Tədbirdə təxminən 20 min qonaq və 1500 nümayəndə üçün birbaşa G2B şəbəkəsi təmin edilib. Sərginin işi inzibati maneələri minimuma endirməyə və uzunmüddətli ekoloji tərəfdaşlıq üçün şərait yaratmağa kömək edib.
İşgüzar proqram panel sessiyaları və ekspert müzakirələrini əhatə edib. Xüsusi diqqət Aral dənizi regionunun bərpasına və Xəzər hövzəsinin ekoloji gündəliyinə, o cümlədən metan emissiyalarının azaldılmasına yönəlib.
Sərgi çərçivəsində “ECO Startup Competition Central Asia”nın finalı, “Astana Eco Film” festivalının qaliblərinin mükafatlandırma mərasimi və “Green Runway” moda şousu da keçirilib.
“RES 2026 EXPO” hökumət, biznes və ekspert icması arasında dialoq üçün əsas platformaya çevrilib, yaşıl iqtisadiyyatın inkişafını təşviq edib və Mərkəzi Asiya üçün davamlı gələcəyi formalaşdırıb.
Bölmənin digər xəbərləri
