ATİ ilə Türkiyənin Qars Qafqaz Universiteti arasında əməkdaşlığa dair müqavilə imzalanmışdır
Bakı, 30 yanvar (AZƏRTAC). Türkiyənin Qars Qafqaz Universitetinin rektoru, professor Sami Özcan, Qafqaz Universitetləri Birliyinin sədri, Ardahan Universitetinin rektoru, professor Ramazan Korkmaz, həmçinin Qafqaz Universitetinin rektoru, professor Əhməd Saniç və Bakı Asiya Universitetinin rektoru, professor Cəlil Nağıyev Azərbaycan Turizm İnstitutunda (ATİ) olmuşlar.
ATİ-dən AZƏRTAC-a bildirmişlər ki, institutun rektoru, professor Cəfər Cəfərov qonaqlara rəhbərlik etdiyi ali təhsil müəssisəsinin yaranma tarixi, fəaliyyəti və beynəlxalq əlaqələri barədə məlumat vermişdir. Türkiyənin bir sıra ali məktəbləri ilə sıx münasibətlər qurulduğunu vurğulayan C.Cəfərov rəhbərlik etdiyi ali təhsil ocağının Qars Qafqaz və Ardahan universitetləri ilə əməkdaşlıqda maraqlı olduğunu diqqətə çatdırmışdır.
Professor Ramazan Korkmaz Qafqaz Universitetləri Birliyi haqqında məlumat verərək birliyin Avropadakı Erasmus Mundus Proqramı kimi bölgədəki ölkə universitetlərinin tələbə və müəllim mübadiləsini dəstəklədiyini, prosesi maliyyələşdirdiyini, qarşılıqlı əməkdaşlığı müvafiq ölkənin gələcəyinə yönəltmək missiyasını strateji hədəf kimi qiymətləndirdiyini bildirmişdir.
Görüşün sonunda ATİ ilə Türkiyənin Qars Qafqaz Universiteti arasında əməkdaşlığa dair müqavilə imzalanmışdır.
Bölmənin digər xəbərləri
