Avropa çempionatı: Azərbaycan şahmatçısı liderliyə yüksəlib
Bakı, 15 aprel, AZƏRTAC
Polşanın Katovitse şəhərində keçirilən şahmat üzrə Avropa çempionatında VII turun partiyaları oynanılıb.
AZƏRTAC xəbər verir ki, azərbaycanlı qrosmeyster Aydın Süleymanlı hesabat turunda uğurlu çıxışını davam etdirib. O, Belçika təmsilçisi Daniel Daroha üzərində qələbə qazanaraq yarış cədvəlində liderliyə yüksəlib. Hazırda aktivində 6 xal olan Aydın Süleymanlı 1-4-cü yerləri bölüşür. Amma şahmatçı əlavə göstəricilərə görə 1-ci pillədə qərarlaşıb. Bu gün oynanılacaq VIII turda Aydın Süleymanlı Gürcüstan şahmatçısı Nikolaz Kaçarava ilə mübarizə aparacaq.
Avropa çempionatında çıxış edən digər təmsilçimiz Nicat Abasov hesabat turunda isveçli Erik Blomkvisti məğlub edib. O, 7 turdan sonra 5,5 xalla 10-cu pillədədir.
Digər şahmatçılarımıza gəlincə, Məhəmməd Muradlı, Şiroğlan Talıbov, Şahin Vəliyev və Süleyman Süleymanlı hərəyə 5 xal toplayaraq müvafiq olaraq, 38-ci, 50-ci, 53-cü və 56-cı yerlərdə qərarlaşıblar.
Qeyd edək ki, qitə çempionatında yüksək nəticə göstərəcək şahmatçılar gələn il keçiriləcək Dünya Kubokuna vəsiqə qazanacaqlar. Avropa çempionatı 11 turdan ibarətdir.
Bölmənin digər xəbərləri
