ELM VƏ TƏHSİL
AZƏRBAYCAN ALIMINƏ “QIZIL REKORD” MEDALI VERILMIŞDIR
Azərbaycan Elmi Tədqiqat Tibbi Bərpa İnstitutunun direktoru, Səhiyyə Nazirliyinin baş nevropotoloqu, Ümumdünya və Avropa Nevroloqlar Assosiasiyasının üzvü, əməkdar elm xadimi, professor Əlişir Musayev Amerika Bioqrafiya İnstitutunun (ABİ) “Qizil rekord” medalına layiq görülmüşdür.
Bununla əlaqədar ABİ-nin prezidenti J. Evansın alimə göndərdiyi təbrik məktubunda deyilir:
-Hörmətli Əlışir Veys oğlu, çox şadam ki, tibb elminə verdiyiniz töhfələr nəzərə alınaraq, Amerika Bioqrafiya İnstitutunun ən nüfuzlu “Qızıl rekord” medalı ilə təltif olunmusunuz. Institutun elmi məşvərət şurası bu mükafatı almaq üçün namizədi dünyanın 75 ölkəsində yaşayan 10 min görkəmli adam içərisindən seçir. Siz bu medala layiq görülmüsünüz.
Professor Ə.Musayev Azərtac-ın müxbiri ilə söhbətində demişdir ki, dövlət müstəqilliyinin on illiyini qeyd edən Azərbaycanın elmi nailiyyətlərini dünyaya tanıtmaq üçün geniş imkanlar yaranmışdır. Son illərdə elmimizin dünyaya inteqrasiyası, alimlərimizin yüksək beynəlxalq mükafatlara layiq görülməsi buna əyani sübutdur. Bütün bunlar ilk növbədə möhtərəm prezidentimiz Heydər Əliyevin Azərbaycan elminə, alimlərimizə göstərdiyi diqqət və qayğının nəticəsidir. Mən layiq görüldüyüm mükafatı Azərbaycan elminə verilən yüksək qiymət kimi qəbul edirəm.