AZƏRBAYCAN AVARÇƏKƏNLƏRİ BEYNƏLXALQ KANOE FEDERASİYASININ REYTİNQİNDƏ YER ALMIŞLAR
Bakı, 20 iyun (AZƏRTAC). Beynəlxalq Kanoe Federasiyası (İCF) kayak və kanoe qayıqlarında avarçəkmə üzrə dünya kubokunun mərhələ yarışlarında göstərilən nəticələrə əsasən, komandaların yekun reytinq cədvəlini açıqlamışdır.
Azərbaycan Milli Avarçəkmə Federasiyasından bildirmişlər ki, Polşada dünya kubokunun II mərhələsində 2 nəfərlik qayıqda 1000 və 500 metrlik məsafəni gümüş medalla başa vuran Azərbaycan yığmasının üzvləri Sergey Bezuqlıy-Maksim Prokopenko cütlüyü 22 xal qazanaraq 17 cütlük arasında reytinqdə 8-ci yeri tutmuşlar.
Birnəfərlik qayıqda 500 metr məsafəyə yürüşdə gümüş medal qazanan Valentin Demyanenko isə 29 kanoeçi arasında 11-ci olmuşdur.
Xatırladaq ki, Valentin Demyanenko ötən il dünya kubokunun hər üç mərhələsində çıxış etmişdi. Həmin yarışlarda ümumilikdə 3 qızıl medal qazanan Demyanenko 32 xal toplayaraq, dünya kanoeçiləri arasında 5-ci, Avropada 3-cü yeri tutmuşdu.
Bölmənin digər xəbərləri
