Azərbaycan Berlin şəhərində keçiriləcək beynəlxalq turizm sərgisində təmsil olunacaqdır
Bakı, 5 mart (AZƏRTAC). Martın 7-dən 11-dək Almaniyanın paytaxtı Berlində “İTB-2012” Beynəlxalq turizm sərgisi keçiriləcəkdir.
Mədəniyyət və Turizm Nazirliyinin turizm şöbəsindən AZƏRTAC-a bildirmişlər ki, beynəlxalq sərgidə ölkəmizin turizm potensialı icarəyə götürülmüş 104 kvadratmetrlik pavilyonda nümayiş olunacaqdır. Burada Azərbaycanın görməli yerləri, mədəni-tarixi abidələri, mehmanxana və turizm obyektləri xüsusi reklam çap məhsulları vasitəsilə təbliğ olunacaqdır.
Sərgidə Azərbaycanı mədəniyyət və turizm nazirinin müavini Nazim Səmədovun başçılıq etdiyi nümayəndə heyəti təmsil edəcəkdir.
Səfər çərçivəsində Azərbaycan ilə Almaniya arasında mədəniyyət sahəsində mövcud əməkdaşlığın perspektivlərinin müzakirə olunması və gələcəkdə daha da genişləndirilməsi məqsədilə bir sıra ikitərəfli görüşlər keçiriləcəkdir.
Bölmənin digər xəbərləri
