Ağcabədi, 26 fevral, AZƏRTAC

Tarixdə elə qanlı hadisələr var ki, təkcə bir xalqa deyil, bütün bəşəriyyətə qarşı ağır cinayət hesab edilir. Erməni şovinist-millətçi qüvvələrinin 1992-ci il fevralın 25-dən-26-na keçən gecə Xocalıda həyata keçirdikləri soyqırımı da məhz insanlığa qarşı törədilmiş bu cür amansız cinayətlər sırasındadır.

AZƏRTAC-ın bölgə müxbiri xəbər verir ki, bu fikir Gənclər üçün Təhsil Mərkəzi (GTM) Qarabağ Regional ofisinin və Yeni Azərbaycan Partiyası (YAP) Ağcabədi rayon təşkilatı Qadınlar Şurasının birgə təşkilatçılığı ilə Xocalı faciəsinin 26-cı ildönümünə həsr edilmiş “Xocalı bizik” adlı anım tədbirində səsləndirilib.

Əvvəlcə tədbir iştirakçıları faciə qurbanlarının xatirəsini bir dəqiqəlik sükutla yad ediblər.

GTM Qarabağ Regional ofisinin rəhbəri, YAP Ağcabədi rayon təşkilatı Qadınlar Şurasının sədri Radə Telmanqızı bildirib ki, Xocalı həqiqətlərinin dünyaya çatdırılması, beynəlxalq aləmdə yayılması, eləcə də soyqırımına obyektiv qiymət verilməsi istiqamətində Azərbaycan dövləti bütün zəruri addımları atır. Bu işdə hər bir Azərbaycan vətəndaşı fəal olmalı, öz üzərinə düşən vəzifəni dərk edərək layiqincə yerinə yetirməlidir.

R.Telmanqızı qeyd edib ki, anım tədbirlərinin uşaqların iştirakı ilə təşkil edilməsi gələcək nəslin daha vətənpərvər böyüməsində, öz tarixini, keçmişini dərindən öyrənməsində mühüm əhəmiyyət kəsb edir.

Bildirilib ki, Azərbaycan xalqı tarix boyu erməni millətçiləri tərəfindən davamlı olaraq etnik təmizləmə, soyqırımı siyasətinə məruz qalıb.

Tədbir GTM Qarabağ ofisi nəzdində fəaliyyət göstərən “İnklüziv Təhsil və Uşaq İnkişaf Mərkəzi”nin və Ağcabədi şəhər 11 nömrəli tam orta məktəbin şagirdlərinin birgə hazırladıqları ədəbi-bədii kompozisiya ilə davam edib.