Bakı, 26 iyul (AZƏRTAC). İyulun 26-da Gənclər və İdman Nazirliyinin yaranmasının 20-ci ildönümü tamam olur. Ulu öndər Heydər Əliyevin 1994-cü il 26 iyul tarixli Fərmanı ilə yaradılan Gənclər, İdman və Turizm Nazirliyi 2006-cı ildə Prezident İlham Əliyevin Fərmanı ilə yenidən təşkil edilərək Gənclər və İdman Nazirliyi adlandırılıb. Ölkəmizdə gənclər siyasətinin əsas icra orqanı məhz bu qurumdur.

Ümummilli lider Heydər Əliyev gəncləri Azərbaycanın gələcək qurucuları adlandırır, onların imkan və bacarıqlarını yüksək qiymətləndirirdi. Gənclər, İdman və Turizm Nazirliyinin yaradılması bu sahədə mühüm tədbirlərin həyata keçirilməsinə geniş yol açdı. Müstəqil Azərbaycan gənclərinin ilk ümumrespublika forumunun keçirilməsi, 2 fevral - Azərbaycan Gəncləri Gününün təsis olunması, bu sahədə dövlət proqramlarının qəbulu Heydər Əliyevin gənclərə böyük qayğısının göstəricisi idi.

Hazırda Azərbaycanda dövlət gənclər siyasəti mahiyyət və keyfiyyət etibarilə yeni mərhələsini yaşayır. Prezident İlham Əliyevin bu sahədə qəbul etdiyi qərarlar, təsdiq etdiyi Dövlət proqramları uğurla icra olunur və müsbət nəticələr verir. Müasir dövrdə Gənclər və İdman Nazirliyinin qarşısında daha mühüm, daha məsul vəzifələr durur. İndi bu nazirlik Azərbaycan gəncliyinin formalaşmasında mühüm rol oynayan ən böyük qurumdur.

Azərbaycan dövləti ölkənin gələcəyi olan yeni nəslin hazırlanmasına xüsusi önəm verir. Prezident İlham Əliyevin 2011-ci il 6 aprel tarixli Sərəncamı ilə təsdiq olunan “Azərbaycan gəncliyi: 2011-2015-ci illər Dövlət Proqramı” gəncliyin rifahına hesablanan dövlət qayğısını bir daha ortaya qoydu. Dövlətimizin başçısının digər bir Fərmanı ilə Azərbaycan Respublikasının Prezidenti yanında Gənclər Fondu yaradıldı. 2007-ci il Azərbaycanda “Gənclər ili” elan edildi və bu çərçivədə silsilə tədbirlər həyata keçirildi. Prezident İlham Əliyevin təsdiq etdiyi digər bir mühüm sənəd - “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” bütün təbəqədən olan gənclərin xaricdə təhsilinə geniş imkan açıb.

Azərbaycanda istedadlı gənclərə qayğı yüksək səviyyədədir. Bunun nəticəsidir ki, 2011-ci il mayın 14-də Almaniyanın Düsseldorf şəhərində keçirilən 56-cı “Eurovision-2011” mahnı müsabiqəsində ölkəmizi təmsil edən gənclər parlaq qələbə qazandılar. Bu qələbə mötəbər yarışmanın 2012-ci ildə Azərbaycanda keçirilməsinə səbəb oldu. Ölkəmiz bu müsabiqəyə yüksək səviyyədə ev sahibliyi etməklə adını “Eurovision” tarixinə böyük hərflərlə yazdı.

Gənclər siyasətində idmanın inkişaf etdirilməsi və onun kütləviliyinin artırılması da mühüm yer tutur. Təkcə paytaxtda deyil, bölgələrdə də yeni olimpiya idman kompleksləri tikilərək istifadəyə verilib. 1997-ci ildən Milli Olimpiya Komitəsinə rəhbərlik edən Prezident İlham Əliyevin ardıcıl səyləri nəticəsində Azərbaycan dünyanın qabaqcıl idman ölkəsinə çevrilib. İdmançılarımızın Olimpiya və dünya çempionatlarında bir-birindən uğurlu çıxışları buna əyani sübutdur. Beynəlxalq yarışlarda qələbə qazanan idmançıların layiqincə qiymətləndirilməsi onları daha böyük uğurlara həvəsləndirir, nəticədə əldə edilən nailiyyətlərin sayı ildən-ilə artır.

Prezident İlham Əliyevin Sərəncamı ilə Azərbaycanda “İdman ili” elan edilən 2012-ci il idmançılarımız üçün çox uğurlu olub. Londonda keçirilən XXX Yay Olimpiya Oyunlarında Azərbaycan idmanın 16 növü üzrə 53 idmançı ilə təmsil olundu. Olimpiadada uğurla çıxış edən idmançılarımız 2 qızıl, 2 gümüş və 6 bürünc medal qazanmaqla əvvəlki Olimpiya Oyunlarındakı rekordu yenilədilər.

Bu gün ölkəmizdə idman əsl yüksəliş dövrünü yaşayır. Azərbaycan Tennis Federasiyası uğurla fəaliyyət göstərir. Mingəçevirdə “Kür” Olimpiya Tədris-İdman Mərkəzi fəaliyyətini daha müasir səviyyədə bərpa edib. Qusarda yaradılan Şahdağ Qış-Yay Turizm Kompleksi isə ölkəmizdə dağ-xizək idmanı və digər qış idman növlərinin, eləcə də turizmin inkişafı üçün hərtərəfli imkanlar açıb. Şahdağ Milli Parkının ərazisində yerləşən, ekoloji təmizliyi, flora və faunasının zənginliyi ilə seçilən bu kompleks indi çoxsaylı turistlərin üz tutduğu məkanlardan biridir. Qəbələdə “Tufan” Dağ-Xizək Yay-Qış İstirahət kompleksinin inşası da Prezident İlham Əliyevin ölkəmizdə idmanın bütün növlərinin inkişafına göstərdiyi diqqət və qayğının sistemli xarakterindən xəbər verir.

Azərbaycanda uğurla həyata keçirilən idman siyasəti nəticəsində ölkəmiz artıq mötəbər beynəlxalq yarışların keçirildiyi məkana çevrilib. Bakıda bədii gimnastika, güləş və boks üzrə dünya çempionatları yüksək səviyyədə keçib. 2012-ci ilin sentyabrında Azərbaycan 17 yaşadək qadınlar arasında futbol üzrə dünya çempionatının final mərhələsinə uğurla ev sahibliyi edib.

2012-ci il dekabrın 8-i isə Azərbaycanın idman tarixinə çox əlamətdar bir hadisə kimi yazıldı. Həmin gün Avropa Olimpiya Komitəsinin Baş Assambleyasında 2015-ci ildə birinci Avropa Oyunlarının Bakıda keçirilməsi haqqında tarixi qərar qəbul edildi. Bu, ölkəmizdə idman sahəsində görülən böyük işlərin məntiqi nəticəsi, eyni zamanda, Avropa Olimpiya ailəsinin Azərbaycana verdiyi yüksək qiymətdir.

Prezident İlham Əliyevin Sərəncamı ilə birinci Avropa Oyunlarının 2015-ci ildə Bakı şəhərində keçirilməsi üzrə Təşkilat Komitəsi yaradılıb. Təşkilat Komitəsinə Heydər Əliyev Fondunun Prezidenti, Azərbaycanın Milli Olimpiya Komitəsi İcraiyyə Komitəsinin üzvü Mehriban Əliyeva sədrlik edir. Ötən il iyulun 11-də bu mötəbər idman yarışının rəsmi internet səhifəsi təqdim olundu. Bu il iyunun 11-də isə ilk Avropa Oyunlarına bir il qalması ilə bağlı geriyə sayımın başlanması münasibətilə Bakı bulvarında möhtəşəm atəşfəşanlıq təşkil edildi.

Bu il iyulun 9-da Fransanın Kann şəhərində keçirilən “Azərbaycan mədəniyyəti günləri” çərçivəsində “Bakı-2015”in təntənəli təqdimat mərasimi oldu. Azərbaycanın birinci xanımı, Heydər Əliyev Fondunun prezidenti, Təşkilat Komitəsinin sədri Mehriban Əliyeva mərasimdə çıxış edərək ölkəmizdə birinci Avropa Oyunlarına hazırlıq işlərinin yüksək səviyyədə həyata keçirilməsi barədə məlumat verdi. İyulun 11-də isə Kannda Avropa Oyunlarına həsr olunan yürüşdə Heydər Əliyev Fondunun vitse-prezidenti Leyla Əliyeva da iştirak etdi.

Artıq ilk Avropa Oyunlarına bir ildən də az vaxt qalır. Ötən dövrdə görülən işlər, tikilən yeni idman obyektləri Azərbaycanın bu Oyunlara yüksək səviyyədə ev sahibliyi edəcəyinə əminlik yaradır.

2017-ci ildə Azərbaycanda daha bir mötəbər yarış - IV İslam Həmrəyliyi Oyunları keçiriləcək. Son illərdə Azərbaycanın idman infrastrukturunun yaradılması istiqamətində həyata keçirilən mühüm tədbirlər, yeni obyektlərin tikilib istifadəyə verilməsi, mövcud idman obyektlərinin yenidən qurulması beynəlxalq yarışların keçirilməsi üçün ölkəmizin imkanlarını daha da artırır. Artıq Milli Gimnastika Arenasının tikintisi başa çatıb. Heydər Əliyev Fondunun prezidenti, Azərbaycan Gimnastika Federasiyasının prezidenti Mehriban Əliyevanın xüsusi qayğısı idmanın bu növünün inkişafına böyük töhfə verir. Bakıda Olimpiya stadionunun tikintisi xüsusi əhəmiyyət kəsb edir. Burada tikinti yüksək sürətlə davam edir və Prezident İlham Əliyev görülən işləri xüsusi nəzarətdə saxlayır.

Azərbaycanda gənclərin məşğulluğunun təmin olunması istiqamətində də mühüm addımlar atılır. İndi ölkəmizdə bir çox gənclər təşkilatı fəaliyyət göstərir, minlərlə gənc lider yetişib. Azərbaycan gənclərin xarici ölkələrdə təşkilatlanması uğurla gedir. “Rusiyanın Azərbaycanlı gənclər təşkilatı”, qurumun sədri, Heydər Əliyev Fondunun vitse-prezidenti Leyla Əliyevanın təşəbbüsü ilə reallaşan layihələr Azərbaycan gəncliyinin Rusiya və dünyadakı maraqlarını layiqincə təmsil edir...

Beləliklə, Azərbaycanda gəncliyə dövlət qayğısı sabaha və uğurlara hesablanan bir siyasətdir. Bu siyasət sağlam və intellektual nəslin formalaşmasına xidmət edir və Azərbaycan gəncliyinin sabahına daha böyük nikbinliklə, inamla baxmağa əsas verir.