AZƏRBAYCAN GƏMİÇİLİYİNİ DƏ PARÇALANMAQDAN HEYDƏR ƏLİYEVİN QƏTİYYƏTİ XİLAS ETMİŞDİR
Möhtərəm cənab Prezident!
Sizin gəmiçiliyimizin çoxminli kollektivinə bəslədiyiniz xüsusi münasibət hər birimizə yaxşı məlumdur. Dənizçilərimiz gündəlik işlərində daim Sizin diqqət və qayğınızı hiss edir, göstərilən yüksək etimadı doğrultmağa çalışaraq, Azərbaycanımızı dünya sularında layiqincə təmsil edirlər. Buna sübut gəmiçiliyin gündən-günə artan nailiyyətləridir. Peşə bayramımız ərəfəsində imzaladığınız Fərman qəlblərimizi riqqətə gətirdi, kollektivimizdə böyük ruh yüksəkliyi yaratdı. Biz Sizə - öz əziz Prezidentimizə hər birimizin dərin minnətdarlığını bildirir və Sizə uzun ömür, cansağlığı və yeni-yeni uğurlar arzulayırıq. Əmin ola bilərsiniz ki, kollektivimiz onun əməyinə verilən bu yüksək qiymətə yeni nailiyyətlərlə cavab verəcəkdir. Azərbaycan Dövlət Xəzər Dəniz Gəmiçiliyinin çoxminli kollektivi bizə bəxş etdiyiniz peşə bayramını artıq ənənəvi surətdə qeyd edir. Belə əlamətdar gündə Sizə - öz diqqət və qayğısını bizdən əsirgəməyən Prezidentimizə nailiyyətlərimiz barədə hesabat verməyimiz də bir ənənəyə çevrilmişdir.
Əziz Prezidentimiz!
Ötən əsrin 90-cı illərinin əvvələrində Azərbaycanın Xəzərdə tutduğu mövqeyi zəiflətmək məqsədilə gəmiçiliyi müəyyən qüvvələrin təsiri ilə parçalamaq üçün onun özəlləşdirilməsinə cəhdlər göstərilirdi. O zaman məhz Sizin qətiyyətli mövqeyiniz sayəsində respublika üçün strateji əhəmiyyəti olan dəniz nəqliyyatının özəlləşdirilməsi plandan çıxarıldı. Daha sonra bilavasitə Sizin köməkliyinizlə dəniz nəqliyyatının inkişafına təkan verən bir çox ciddi addımlar atıldı. Onların nəticəsidir ki, gəmiçilik həm Xəzərdə aparıcı mövqeyini, həm də nəqliyyat donanmasını bütövlükdə qoruyub saxlaya bilmiş və bu il 145 yaşını da yüksək göstəricilərlə qeyd edir. Belə ki, 1998-ci ildə yükdaşımaların həcmi 8 milyon 177,9 min ton olduğu halda, 2002-ci ildə artıq bu göstərici 11 milyon 378 min ton idi. Bu isə həmin dövrdə daşınan yüklər həcminin 39,1 faiz artması deməkdir. Cari ilin 6 ayı üzrə də göstəricilərimiz proqnozla nəzərdə tutulduğundan artıqdır. Hesabat dövrünün nəticələrinə görə, nəqliyyat donanması ilə 5 milyon 300 min ton əvəzinə, 6 milyon 418 min ton müxtəlif yüklər daşınmışdır. Bu dinamik irəliləyişə, mövcud potensialdan tam və səmərəli istifadə edilməsinə görə biz, əlbəttə ki, ilk növbədə Sizə borcluyuq. Məhz Sizin gərgin səyinizlə həyata keçirilən nəhəng planlar, o cümlədən Azərbaycanın neft strategiyasını müəyyənləşdirən “Əsrin müqaviləsi”, tarixi “İpək yolu”nun dirçəldilməsi və ən nəhayət, Bakı-Tbilisi-Ceyhan boru kəmərinin inşası gəmiçilik qarşısında belə geniş imkanlar açmışdır. Gəmiçilik də perspektiv vəzifələrini müəyyənləşdirərək, texniki bazasını möhkəmləndirmək, donanmasını yeniləşdirmək və onun yükdaşıma qabiliyyətini artırmaq üçün bütün lazımi tədbirləri görür və görməkdədir: keçən il bir ədəd quru yük daşıyan gəmi alınmış, bu il isə hər biri 8 min tonluq dedveytə malik olan iki tankerin istismara verilməsi planlaşdırılmışdır. Həmin tankerdən biri -“Professor Əziz Əliyev” gəmisi artıq avqust ayında Bakıya gətiriləcəkdir. İkinci tanker də iyun ayının 28-də suya buraxılmış və ilin sonunadək Bakıda olacaqdır. Hər biri 12 min tonluq dedveytə malik olan daha iki tanker isə gələn il nəqliyyat donanmamızın cərgəsinə qoşulacaqdır. Bu gün gəmiçilik sabit maliyyə vəziyyətində olmaqla, 7 minlik dənizçi ordusunu işlə təmin edir, sosial gərginliyin yaranmasına yol vermir. Dənizçilərin və onların təxminən 35 minə yaxın ailə üzvünün rifahının yüksəlməsinə çalışır: əmək haqları vaxtlı-vaxtında verilir və müntəzəm olaraq artırılır. May ayının əvvəlində dənizçilərin maaşları 20 faiz artırılmış və ilin sonunadək bir daha artırılması nəzərdə tutulmuşdur. Planlı surətdə həyata keçirilən tədbirlər gəmiçilik kollektivinin maddi vəziyyətinə müsbət təsir göstərmişdir. Lakin gəmiçilikdə görülən işlərlə kifayətlənmirlər. Kollektivin hər bir üzvü əldə olunan nailiyyətlərin sayını artırmaq, müstəqil dövlətimizin üçrəngli bayrağını dünya sularında layiqincə dalğalandırmaq üçün əllərindən gələni əsirgəmir.
Əziz Prezidentimiz!
Gəmiçilik XXI əsrə uğurla qədəm qoymuşdur. Onu gələcək nəsillər üçün quruyub saxlamaq, nüfuzunu daha da artırmaq indi bizim ümdə vəzifəmizdir. Bunun üçün kifayət qədər təcrübəmiz var – gəmiçilik həmişə öz əmək ənənələri ilə seçilmiş, neçə-neçə dənizçilər nəsli, əməkçi sülalələri yetişdirmişdir. Oğulun öz atasının sənətini davam etdirmək arzusu hər bir dənizçi üçün fəxrdir. Azərbaycan dövlətçiliyində də belə bir ənənə üçün zəmin var. Bu, möhtərəm Prezidentimizin məktəbində dərs almış siyasətçi, Dövlət Neft Şirkətinin birinci vitse-prezidenti, Milli Olimpiya Komitəsinin Prezidenti, Milli Məclisin deputatı İlham Əliyevdir. Avropa Şurası Parlament Assambleyasının sədr müavini və Büro üzvü kimi də onun gərgin və səmərəli fəaliyyəti haqlı olaraq xalqımızın rəğbətini qazanmışdır.
Əziz Prezidentimiz!
Sizin işgüzar, məqsədyönlü, səmərəli əməyiniz hər bir dənizçi üçün əməli fəaliyyət meyarıdır. Əmin ola bilərsiniz ki, kollektivimiz Sizin etimadınızı doğrultmaq üçün öz səy və bacarığını əsirgəməyəcək, Azərbaycanı həmişə layiqincə təmsil edəcəkdir. Başqa cür ola da bilməz. Çünki artıq Azərbaycan məhz Sizin gərgin fəaliyyətiniz sayəsində beynəlxalq aləmdə tanınmış, dünya birliyində özünə layiqli yer tutmuşdur. Görülən işlər xalqımızın sabaha inamını möhkəmlətməklə yanaşı, gələcək uğurların da bünövrəsini qoyur. 145 yaşlı gəmiçiliyin timsalında biz bunun şahidiyik. Oktyabrın 15-də respublikamızda keçiriləcək prezident seçkilərində biz yekdilliklə Sizə - öz sevimli Prezidentimizə səs verəcəyik. Azərbaycan adlı gəmimizin sükanı arxasında biz yalnız Sizin kimi müdrik və qətiyyətli Lideri görürük.
Müraciət Azərbaycan Dövlət Xəzər Dəniz
Gəmiçiliyi işçilərinin peşə bayramı və
gəmiçiliyin 145 illiyi münasibətilə
2003-cü il iyulun 5-də keçirilmiş təntənəli
yığıncaqda qəbul edilmişdir.
Bölmənin digər xəbərləri
