Azərbaycan ilə Çexiya arasında gənclər və idman sahəsində əməkdaşlıq məsələləri müzakirə olunub
Bakı, 20 noyabr, AZƏRTAC
Avropa Olimpiya Komitəsinin (AOK) Praqada keçirilən 44-cü Baş Assambleyasının və AOK-un İcraiyyə Komitəsinin iclaslarında iştirak etmək üçün Çexiyada səfərdə olan gənclər və idman naziri Azad Rəhimov bu ölkənin təhsil, gənclər və idman naziri xanım Katerina Volaxova ilə görüşüb.
Gənclər və İdman Nazirliyinin mətbuat xidmətindən AZƏRTAC-a bildiriblər ki, görüşdə çexiyalı nazir birinci Avropa Oyunlarına yüksək səviyyədə ev sahibliyi etməsi münasibətilə Azərbaycana təbriklərini çatdırıb.
Söhbət zamanı həm Azərbaycanda, həm də Çexiyada gənclər və idman siyasəti, bu sahələrdə həyata keçirilən layihələr haqda qarşılıqlı olaraq ətraflı məlumat verilib. Həmçinin keçirilən tədbirlərdə azərbaycanlı və çexiyalı gənclərin iştirakı yüksək qiymətləndirib, bu istiqamətdə əməkdaşlığın daha da möhkəmləndirilməsinin önəmi vurğulanıb. Nazirlər daha sıx əməkdaşlıq istiqamətində yeni layihələrin işlənib hazırlanmasının zəruriliyini bildiriblər.
Katerina Volaxova Vişeqrad qrupunda və “Şərq tərəfdaşlığı” proqramında Azərbaycanın fəallığını yüksək qiymətləndirib, bu əməkdaşlıq üçün ölkəmizə təşəkkür edib.
Bölmənin digər xəbərləri
