“Azərbaycan incəsənətində vətənpərvərlik mövzusu” adlı elmi-praktik seminar keçirilib
Bakı, 7 noyabr, AZƏRTAC
Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzinin (MEMİM) təşkilatçılığı ilə Beynəlxalq Muğam Mərkəzində “Azərbaycan incəsənətində vətənpərvərlik mövzusu” adlı elmi-praktik seminar keçirilib.
Mərkəzdən AZƏRTAC-a bildirilib ki, tədbirdə əvvəlcə şəhidlərimizin əziz xatirəsi bir dəqiqəlik sükutla yad edilib.
Azərbaycan Dövlət Nəfəs Alətləri Orkestrinin (bədii rəhbər və baş dirijor: Əməkdar incəsənət xadimi Əlibala Rzayev) ifasında Dövlət Himnimiz səsləndirilib. Həmçinin orkestr Qara Qarayevin “Azərbaycan marşı”nı ifa edib.
Qonaqlar Dövlət Rəsm Qalereyası tərəfindən Muğam Mərkəzində Zəfərimizin 5-ci ildönümü münasibətilə təşkil edilən rəsm sərgisi ilə tanış olublar. Sərgidə tanınmış sənətkarlar Arif Hüseynov, Mir Azər Abdullayev, Tahir Şıxəliyev, Nazim Məmmədov, eləcə də bir neçə gənc rəssamın qrafika, rəngkarlıq və plakat janrlarında işlənmiş 21 əsəri yer alıb.
Tədbirdə çıxış edən MEMİM-in direktor vəzifəsini icra edən sənətşünaslıq üzrə fəlsəfə doktoru, dosent Vüqar Hümbətov bildirib ki, seminarın Zəfər Günü ərəfəsində keçirilməsi təsadüfi deyil. Onun fikrincə, tarixi Qələbəmiz bu gün yaradıcı insanların ilham mənbəyinə çevrilib və incəsənətin müxtəlif sahələrində bu mövzuda diqqətəlayiq əsərlər yaradılıb.
Bakı Şəhər Mədəniyyət Baş İdarəsinin rəisi İbrahim Əliyev tariximizə qızıl hərflərlə yazılan 44 günlük Vətən müharibəsində şanlı Zəfərin xalqımıza əbədi qürur bəxş etdiyini diqqətə çatdırıb.
Azərbaycan Bəstəkarlar İttifaqının katibi sənətşünaslıq üzrə fəlsəfə doktoru, Əməkdar incəsənət xadimi, professor Elnarə Dadaşovanın “Musiqidə vətənpərvərlik”, Əməkdar incəsənət xadimi, şair Baba Vəziroğlunun “Vətən sevgisi sözün qüdrəti ilə”, Əməkdar incəsənət xadimi, kinorejissor Ayaz Salayevin “Azərbaycan kino səltənətinin qəhrəmanlıq salnaməsi”, Əməkdar artist, professor Azad Şükürovun “Vətənpərvərlik ruhu teatr səhnəsində” və MEMİM-in əməkdaşı, qazi, teatrşünas Dağlar Yusifin “Sənət və cəbhə arasında” mövzularında məruzələri dinlənilib.
Tədbirdə bədii proqrama təqdim olunub.
Seminar çərçivəsində rejissor, Əməkdar incəsənət xadimi Cahangir Zeynallının Xalq artisti Firəngiz Əlizadənin musiqi əsərləri əsasında hazırladığı “Zəfər yolu” filmi nümayiş etdirilib.
Bölmənin digər xəbərləri
