Azərbaycan nümayəndə heyəti “FITUR” Beynəlxalq turizm sərgisində iştirak etmək üçün Madridə gəlmişdir
Bakı, 16 yanvar (AZƏRTAC). Xəbər verdiyimiz kimi, yanvarın 18-dən 22-dək Madrid şəhərində “FITUR” Beynəlxalq turizm sərgisi keçiriləcəkdir.
Mədəniyyət və Turizm Nazirliyindən AZƏRTAC-a bildirmişlər ki, artıq nazir müavini Nazim Səmədovun rəhbərliyi ilə Azərbaycan nümayəndə heyəti sərgidə iştirak etmək üçün Madridə gəlmişdir.
Azərbaycan 2007-ci ildən başlayaraq ənənəvi “FITUR” Beynəlxalq turizm sərgisində təmsil olunur. Builki sərgidə respublikamızın turizm imkanlarını nümayiş etdirmək üçün 52 kvadratmetr sahədə pavilyon qurulacaqdır.
Səfər çərçivəsində Azərbaycan nümayəndə heyəti ölkəmiz üçün ayrılmış sahədə respublikamızın zəngin turizm potensialını nümayiş etdirməklə yanaşı, qərargahı Madrid şəhərində yerləşən Dünya Turizm Təşkilatının, həmçinin İspaniyanın aparıcı turizm təşkilatlarının rəhbərləri ilə ikitərəfli görüşlər keçirəcəkdir.
“FITUR” Beynəlxalq turizm sərgisinin direktoru xanım Ana Larranaga ilə keçiriləcək görüşdə ölkəmizin bu mötəbər sərgidə iştirakı və gələcək əməkdaşlıq imkanları müzakirə olunacaqdır.
Bölmənin digər xəbərləri
