AZƏRBAYCAN OTÜSTÜ XOKKEY FEDERASİYASI FİH-Ə MƏKTUB GÖNDƏRMİŞDİR
Bakıda otüstü xokkey üzrə qadınlardan ibarət yığma komandalar arasında keçirilmiş lisenziya xarakterli beynəlxalq turnir zamanı baş verən dopinq qalmaqalı ilə bağlı yekun qərar hələ də çıxarılmamışdır.
Azərbaycan Otüstü Xokkey Federasiyasının mətbuat xidmətindən AZƏRTAC-a bildirmişlər ki, qurum bununla əlaqədar Beynəlxalq Xokkey Federasiyasına (FİH) məktub göndərmişdir. Məktubda yaranmış qeyri-müəyyən vəziyyətlə əlaqədar narahatçılıq ifadə olunmuşdur. Diqqətə çatdırılmışdır ki, Bakıda keçirilən yarışda İspaniya yığmasının iki üzvünün dopinq qəbul etməsi müəyyənləşmişdir. Dopinq qalmaqalı ilə bağlı yekun qərarın iyunun sonunadək çıxarılacağı gözlənilirdi. Lakin indiyədək FİH rəhbərliyi heç bir açıqlama verməmişdir. Məktubda beynəlxalq qurumun məsələyə etinasız yanaşması, tezliklə yekun qərarın qəbul olunması qeyd edilmişdir.
Bildirilmişdir ki, Milli Olimpiya Komitəsi, eləcə də Azərbaycan Gənclər və İdman Nazirliyi rəhbərliyi eyni məzmunlu məktubu həm FİH-ə, həm də Beynəlxalq Olimpiya Komitəsinə göndərmişdir.
Xatırladaq ki, Bakıda keçirilən lisenziya xarakterli yarışda birinci yeri tutan İspaniya yığması Pekin Olimpiadasında iştirak hüququna yiyələnib. İspaniyalı xokkeyçilərin turnir zamanı istifadəsi qadağan olunmuş dərman preparatı qəbul etməsi aşkarlandıqdan sonra finalçı kimi Azərbaycan milli komandasının olimpiadaya yollanmaq ehtimalı yaranıb. Dopinq qalmaqalı ilə əlaqədar ispaniyalılar hazırda FİH Hüquq Komissiyası tərəfindən dindirilir.
Bölmənin digər xəbərləri
