AZƏRBAYCAN PREZİDENTİ İLHAM ƏLİYEV LİLL ŞƏHƏRİNƏ GƏLMİŞDİR
AZƏRTAC-ın xüsusi müxbirləri xəbər verirlər ki, Azərbaycan Respublikasının Prezidenti İlham Əliyev yanvarın 31-də Fransa paytaxtının “Paris-Nord” vağzalından yüksək sürətli “TGV” qatarı ilə ölkənin ən şimalında yerləşən Nord-Pa-de-Kale regionunun baş şəhəri olan Lillə gəlmişdir.Prezident İlham Əliyevi dəmir yolu vağzalında Nord-Pa-de-Kale regional şurasının sədri Daniel Perşeron qarşıladı.
Dövlətimizin başçısı regionun Ticarət palatasına gəldi. Binanın qarşısında Prezident İlham Əliyevi palatanın sədri Patrik Van den Şrik böyük hörmət və ehtiramla qarşıladı. O, palatanın tarixi və fəaliyyəti barədə dövlətimizin başçısına məlumat verərək dedi ki, palatanın yerləşdiyi bina 1910-cu ildə bu bölgədə toxuculuqla məşğul olan iş adamları tərəfindən tikilmişdir, geniş salonları və iş otaqları vardır. Ticarət palatası, əsasən, bu regionun iş adamlarının istər ölkə daxilində, istərsə də xaricdə fəaliyyəti üçün lazımi məsləhətlər verir.
Sonra Ticarət palatasının iclas salonunda regionun işgüzar adamları ilə görüş keçirildi. Patrik Van den Şrik görüşü açaraq, ali qonağı və onu müşayiət edən şəxsləri bir daha salamladı. O dedi ki, Azərbaycan Prezidenti İlham Əliyevin Lill şəhərinə gəlməsi bizim üçün böyük və əlamətdar hadisədir, son bir neçə ildə biz belə yüksək qonaq qarşılamamışdıq. Ticarət palatasının sədri işgüzar dairələrin nümayəndələrini təqdim edərək bildirdi ki, Lill şəhəri Fransanın sənaye mərkəzlərindən biridir. Regionun iş adamlarının Böyük Britaniya, Hollandiya, Almaniya və Avropanın digər ölkələri ilə geniş əlaqələri vardır. Fransanın, o cümlədən bu bölgənin iş adamları Azərbaycanla da əməkdaşlığa böyük maraq göstərirlər.
Prezident İlham Əliyev görüşdə nitq söylədi. Fransaya səfərinin başa çatdığını və bu səfərin tərəflər üçün əhəmiyyətli olacağını söyləyən dövlətimizin başçısı dedi ki, Fransa şirkətləri Azərbaycanda müxtəlif layihələrdə iştirak edirlər və biz bunu yüksək qiymətləndiririk.
Bu səfərdən sonra Fransa şirkətləri Azərbaycanda daha fəal işləyəcək və əlaqələrimiz daha da möhkəmlənəcəkdir. Fransa və Azərbaycanın regionları arasında əlaqələrin inkişafı üçün yaxşı imkanın olduğunu bildirən Prezident İlham Əliyev dedi ki, əminəm, mənim bu regiona səfərimdən sonra buranın iş adamları Azərbaycana gələcək və biz birlikdə işləyəcəyik.
Dövlətimizin başçısı bildirdi ki, Azərbaycanda bizneslə məşğul olmaq çox əlverişlidir, bunun üçün çox gözəl mühit var, indiyədək ölkəmizə 33 milyard dollar sərmayə qoyulmuşdur. Ölkəmizdə enerji sektoru ilə yanaşı, qeyri-neft sektorunda da çalışmaq mümkündür və bunun üçün çox gözəl imkanlar vardır.
Azərbaycanda iqtisadi inkişafın sürətlə getdiyini və bu baxımdan dünyada birinci yeri tutduğunu söyləyən Prezident İlham Əliyev dedi ki, 2005-ci ildə iqtisadi artım 26 faiz, 2006-cı ildə 35 faiz olmuşdur. Çox güman ki, bu il də iqtisadi artım eyni səviyyədə olacaqdır. Əlverişli investisiya mühitindən istifadə edib, müxtəlif şirkətlərlə əməkdaşlıq edirik və istərdik ki, Fransa şirkətləri daha da fəal olsunlar.
Dövlətimizin başçısı bildirdi ki, ölkəmizin gəlirləri, büdcəmizin həcmi artır və gələcəkdə mühüm layihələr həyata keçirəcəkdir. İnfrastruktur və tikinti sahəsində böyük layihələr nəzərdə tutulur və bu işdə Fransa şirkətləri də iştirak edə bilər. Hər bir iqtisadi uğurun təməlində ictimai-siyasi sabitliyin durduğunu söyləyən Prezident İlham Əliyev dedi ki, Azərbaycanda sabitlik olmasaydı, ölkəmizə bu qədər sərmayə qoyulmazdı. Azərbaycan regional layihələrdə aparıcı yer tutur, neft-qaz kəmərləri vasitəsilə Azərbaycanın təbii sərvətləri dünya bazarlarına çatdırılır. Azərbaycan Avropanın enerji təhlükəsizliyinin təmin edilməsinə öz töhfələrini verməyə başlamışdır. Fransa ilə əlaqələrin bir hissəsi də Avropa İttifaqı ilə əməkdaşlıq istiqamətindədir, Avropa İttifaqı ilə ötən ilin noyabr ayında müqavilə imzalanmışdır və bu, ölkəmizi Avropaya daha da yaxınlaşdıracaqdır. Bütün bu işlər Azərbaycanı Avropa üçün mühüm tərəfdaşa çevirəcək və siyasi, iqtisadi sahədə əlaqələr daha da möhkəmlənəcəkdir.
Prezident İlham Əliyev Fransanın, o cümlədən bu regionun şirkətlərini bir daha ölkəmizə dəvət etdi, dövlət səfəri zamanı göstərilən qonaqpərvərliyə görə təşəkkürünü bildirərək, Fransa ilə əlaqələrin dostluq, əməkdaşlıq əsasında qurulduğunu söylədi.
Sonra Fransanın “Eurosast”, “Eriteks”, “Mod-Material”, “Tekmipol Lill Metropol”, “Transport Terrestr Promosyon” şirkətlərinin nümayəndələri çıxış etdilər.
Onlar əsasən kənd təsərrüfatı, yüngül sənaye, mebel, məişət əşyaları istehsalı, istehsal müəssisələri üçün yeni texnologiyaların hazırlanması, elmi tədqiqat işlərinin görülməsi, rabitə və informasiya texnologiyaları və digər sahələrdə fəaliyyət göstərdiklərini söylədilər, Azərbaycanda da işləmək istədiklərini bildirdilər.
Nord-Pa-de-Kale regional şurasının sədri Daniel Perşeron çıxışında yüksək səviyyəli xalqın təmsilçilərinin - Azərbaycan Prezidenti İlham Əliyevin və nümayəndə heyəti üzvlərinin bu görüşdə iştirakının özləri üçün böyük şərəf və tarixi hadisə olduğunu vurğuladı. O, möhkəm sabitliyin olduğu və inkişaf edən ölkə kimi Azərbaycanda yaradılmış sərmayə mühitindən Fransa şirkətlərinin faydalanmasının hər iki tərəf üçün sərfəli olacağını söylədi. Şuranın sədri yüksək səviyyəli siyasi lider kimi Prezident İlham Əliyevin fəaliyyətini təqdir etdi.
Xoş sözlərə görə təşəkkür edən Prezident İlham Əliyev hər bir layihənin uğurla həyata keçməsi üçün xoş niyyətin olmasının vacibliyini söylədi və ölkələrimiz arasındakı münasibətlərin bütün layihələrin yüksək səviyyədə reallaşdırılmasına imkan verdiyini bildirdi.
Palatanın sədri Azərbaycan Prezidenti ilə keçirilən bu görüşün çox faydalı nəticələr verəcəyini vurğuladı.
Bölmənin digər xəbərləri
