AZƏRTAC xəbər verir ki, Prezident İlham Əliyev sentyabrın 27-də Quba rayonunda, əsasən, dağ yəhudilərinin yaşadığı Qırmızı qəsəbədə olmuşdur.

Dövlətimizin başçısı sakinlərlə görüşüb söhbət etdi.

Dağ Yəhudiləri İcmasının sədri BORİS SİMANDUYEV Prezidenti böyük ehtiramla salamlayaraq dedi:

- Hörmətli, əziz Prezidentimiz, biz Sizi hər dəfə burada görəndə məmnunluq hissi keçiririk. Sizinlə görüşümüz qəlbimizdə elə bir iz buraxır ki, illərlə təəssürat altında oluruq. Biz ona görə Sizi sevirik ki, Siz bizim ölkəmizi, respublikamızı çox qüdrətli bir dövlətə çevirmisiniz. Bugünkü gündə Azərbaycanla hesablaşmayan elə bir dövlət yoxdur. Çox böyük dövlətlərin rəhbərləri Sizinlə görüşə can atırlar. Biz bundan iftixar hissi keçiririk. Əminik ki, Siz bizi gözəl gələcəyə aparacaqsınız. Buna biz heç bir şübhə etmirik. Çünki siz bizim çoxmillətli dövlətdə əmin-amanlıq yaratmısınız. Əmin-amanlıq da ki, əsas şərtdir. Əmin-amanlıq olmayan yerdə inkişaf da ola bilməz. Bu, Azərbaycanda var. Dinlər arasında olan münasibətlər də bir-birinə qarşılıqlı hörmət əsasında qurulur. Bütün konfessiyalar bir-birinə hörmət edirlər, bizdə əmin-amanlıq var. Harada əmin-amanlıq olursa, orada tərəqqi də olur. Allaha şükür, Azərbaycanda həmişə əmin-amanlıq olub, mənə elə gəlir ki, tolerantlıq nöqteyi-nəzərindən Azərbaycan bütün dünya üçün nümunə ola bilər. Bizə çoxlu qonaqlar gəlir, onlar bizimlə görüşür, fikrimizi öyrənirlər. Eşidəndə ki, bizdə, Azərbaycanda millətlər arasında əlaqələr necə qurulub, onlar bizə qibtə edirlər, bizdən razılıq hissi ilə ayrılırlar. Biz ümidvarıq ki, bu, belə də olacaqdır.

Möhtərəm Prezident, Sizin rəhbərliyiniz nəticəsində Azərbaycanın siması tamamilə dəyişibdir. Yəni Azərbaycanın elə bir regionu yoxdur ki, orada inkişaf, tərəqqqi olmasın. İstehsal müəssisələri tikilir, iş yerləri yaradılır, ictimai binalar, mədəni-maarif ocaqları, məktəblər tikilir. Həddən artıq inkişaf gedir. Belə bir qüdrətli dövlət bizi ruhlandırır, yaşayıb-yaratmağa sövq edir.

Siz keçən illərdə burada olanda, bəlkə də yuxarıdan baxanda bu imarətləri görməmişdiniz. İndi Allaha şükür, baxıb görürsünüz ki, nə qədər bizdə inkişaf var, gözəl bir qəsəbə yaratmışıq. Buraya gələn qonaqlar bizə baxıb fərəhlənirlər. Onlar da fərəhlənirlər ki, belə bir ölkədə, belə bir inkişaf var. Mənə belə gəlir ki, bu inkişafı görməyən ya kor, ya kardır, yaxud da ki, onlar qanmazdır, qanmırlar. Biz bunu görürük, bunu dərk edirik. Fəxr edirik ki, Allah-taala bizə Sizin kimi bir Prezidenti bəxş edibdir. Biz xoşbəxt adamlarıq. Hamımız ümidvarıq ki, bizə bəxş edilən bu insan bizim dayağımız olacaq, biz də onun ətrafında sıx birləşib, ona dayaq olacağıq. Çünki, biz ona inanırıq, onu sevirik, onunla fəxr edirik.

Allaha şükür edirik ki, Siz buraya belə bir vaxtda - bayramlar ərəfəsində gəlmisiniz. Bizim camaatımız bir aya yaxındır ki, səhər sübh açılandan sinaqoqlarda ibadət edir, Allah-taalaya üz tutub bizim dövlətimizin başçısına cansağlığı arzu edir, dövlətimizin tərəqqisi naminə dualar deyir. Bizim camaatımız, xalqımız Allaha yaxın adamlardır. Allah-taala da bizim səsimizi eşidir, bizə kömək olur, Sizə kömək olur, Siz də bizə kömək olursunuz. Mən Sizi bu bayramlar münasibətilə - Ramazan bayramı, yəhudilərin Yeni il bayramı münasibətilə təbrik edirəm. Sizə cansağlığı, uzun ömür, ailə səadəti, bizi gözəl gələcəyə aparmaqda qüvvə, iradə arzulayırıq.

Möhtərəm Prezident, bir də Yeni il bayramında Allah-taala bütün insanların qismətini müəyyən edir. İlin başında nə olacaqsa, həyat necə başlayacaq, necə qurtaracaqsa - onu təyin edir. Allah-taala elə etsin ki, Sizin adınız Allahın həyat kitabında müqəddəs insanların arasında birinci yazılsın. Dövlətimiz tərəqqi etsin, Azərbaycan iri addımlarla bundan sonra da inkişaf etsin. Amin!

İLHAM ƏLİYEV: Çox sağ olun, xoş sözlərinizə görə sizə minnətdaram. Sizi ilk növbədə qarşıdan gələn bayram münasibətilə təbrik etmək istəyirəm. Rəsmi məktub da imzalamışam. Bütün yəhudiləri onların bayramı münasibətilə təbrik edirəm və bu bayramda bütün yəhudi icmasının üzvlərinə xoşbəxtlik, cansağlığı, yeni uğurlar arzulamaq istəyirəm.

Siz çox düzgün söylədiniz ki, bizim ölkəmizin üstünlüyü ondadır ki, burada bütün millətlər, bütün dinlərin nümayəndələri bir ailə kimi yaşayırlar, qardaş kimi yaşayırlar. Bu, bizim xüsusiyyətimizidir və bu, bizə təbii gəlir. Biz buna öyrəşmişik. Biz uşaqlıq dövründən belə ab-havada yaşamışıq. Bəzi xarici qonaqlar Azərbaycana gələndə, yaxud da ki, bizim təcrübəmizi öyrənməyə başlayanda təəccüblənirlər. Necə ola bilər ki, burada bütün xalqlar çox mehriban şəraitdə yaşayırlar, qardaşlıq şəraitində yaşayırlar. Azərbaycan çoxmillətli ölkədir, çoxkonfessiyalı ölkədir və bu, bizim böyük nailiyyətimizdir və böyük sərvətimizdir. Bütün millətlərin nümayəndələri bir ailə kimi, qardaş kimi yaşayırlar, yaradırlar, Azərbaycanın inkişafında öz mühüm əməyini qoyurlar və ölkəmizin inkişaf etmiş dövlətə çevrilməsi işində öz fəaliyyətlərini göstərirlər.

Bizim ölkəmiz, bütün bölgələr inkişaf edir. O cümlədən Qubada Qırmızı qəsəbənin inkişafı da xüsusi yer tutur. Burada tikilən binalar, gözəl şərait, əlbəttə ki, çox sevindiricidir. Mən çox istəyirəm ki, burada həmişə həyat belə gur olsun, həmişə toy-bayram olsun, həmişə sülh, əmin-amanlıq şəraitində yaşasınlar. Mən də Prezident kimi əlimdən gələni edirəm və bundan sonra da edəcəyəm ki, Azərbaycanda bu gözəl ənənələr davam etsin, əbədi olsun və əbədi də olacaqdır. Azərbaycanın inkişafı uzunmüddətli olsun, burada sabitlik, əmin-amanlıq daha da möhkəmlənsin, bütün görülən işlər insanların daha da yaxşı yaşamasına xidmət göstərsin.

Biz iqtisadi cəhətdən xeyli dərəcədə güclənmişik.

Müstəqil ölkəmiz son illər ərzində misli görünməmiş inkişaf yaşayıbdır. Sosial məsələlərin həlli, investisiyalar, büdcə artımı - bütün bunlar insanların gündəlik həyatına öz təsirini göstərir. Mən istəyirəm ki, daha da çox göstərsin. İstəyirəm ki, Azərbaycanda yoxsulluq, işsizlik olmasın, insanlar yaxşı işlə təmin olunsunlar, yaxşı maaş alsınlar, yaxşı pensiya alsınlar. Düzdür, son illər ərzində biz bütün bu sosial ödəmələri xeyli dərəcədə artırmışıq, ancaq hələ ki, bu, bizi tam şəkildə qane edə bilməz. Bizim istəyimiz odur ki, Azərbaycan inkişaf etmiş ölkələrin sıralarına daxil olsun və inkişaf etmiş ölkələrə xas olan bütün parametrlər Azərbaycanda tətbiq olunsun. Bunu etmək üçün bizim imkanlarımız var. Allaha şükür, təbii ehtiyatlar var, gözəl təbiət var, regionların inkişafı sürətlə gedir, ictimai vəziyyət çox müsbətdir, təhlükəsizlik, sabitlik şəraitində yaşayırıq, vətəndaş həmrəyliyi, millətlərarası sülh şəraitində yaşayırıq. Bilirsiniz, bir daha demək istəyirəm ki, heç də hər bir ölkədə belə gözəl mənzərə müşahidə olunmur. Baxın, dünyanın müxtəlif yerlərində, uzaq, yaxın bölgələrdə nə qədər böyük çaxnaşmalar, qarşıdurmalar var. Milli zəmində, dini zəmində qarşıdurma, bəzi hallarda münaqişə, bəzi hallarda sadəcə məişət zəminində qarşıdurma var. Bunların heç biri Azərbaycanda yoxdur, heç biri də olmayacaqdır. Bunun təminatçısı Azərbaycan xalqıdır, bizim siyasətimizdir, bax, sizin fəaliyyətinizdir, sizin Azərbaycanda xoşbəxt, rahat yaşamağınızdır. Bu, doğrudan da böyük sərvətdir və bir daha demək istəyirəm ki, biz buna öyrəşmişik. Biz hesab edirik ki, bu, təbiidir və biz haqlıyıq. Bəzi başqa yerlərdə yaşanan hadisələr təbii deyil. Onlar süni şəkildə ortaya atılmış ədavət toxumlarıdır ki, insanları bir-birinə qarşı hərəkət etməyə məcbur edir. Bizim ölkəmiz isə öz inkişafına bax, bu cür davam edəcəkdir - həm iqtisadi inkişaf, həm sosial məsələlərin həlli, güclü siyasət, xarici siyasət. Siz öz sözünüzdə bizim xaricə siyasətə toxundunuz. Bizim siyasətimiz çox açıqdır, aydındır, birmənalıdır, səmimidir. Biz öz maraqlarımızı müdafiə etməliyik, bütün ölkələrlə yaxşı münasibətlər qurmalıyıq və işləri qarşılıqlı maraqlar əsasında aparmalıyıq. Azərbaycanın hər bir bölgəsində, hər bir qəsəbəsində, kəndində bu gözəl inkişaf daha da sürətlə getməlidir.

Mən çox şadam ki, yenidən sizinlə görüşürəm. Bu bizim birinci, ikinci görüşümüz deyildir. Qubada olarkən həmişə çalışıram ki, sizinlə görüşüm, öz ürək sözlərimi sizə deyim və bu vasitə ilə öz hörmət, məhəbbətimi bir daha ifadə edim.

Sizə uğurlar, cansağlığı, xoşbəxtlik arzulayıram.

######