Azərbaycan rəssamlarının vahid informasiya bazası və qalereyanın veb-saytı təqdim edilib
Bakı, 27 oktyabr, AZƏRTAC
Oktyabrın 27-də Muzey Mərkəzində Mədəniyyət və Turizm Nazirliyinin, Azərbaycan Dövlət Rəsm Qalereyasının təşkilatçılığı ilə Azərbaycan rəssamlarının vahid informasiya bazasının və qalereyanın veb-saytının ( www.azgallery.az ) təqdimatı keçirilib.
AZƏRTAC xəbər verir ki, tədbirdə mədəniyyət və turizm nazirinin müavini Ədalət Vəliyev çıxış edərək informasiya bazasının və rəsm qalereyasının veb-sayıtının yaradılmasının əhəmiyyətlindən danışıb. Bildirib ki, rəsm qalereyası 1960-cı ildən fəaliyyət göstərən Azərbaycan Dövlət Sərgi Salonunun bazasında 1972-ci ildə ümummilli lider Heydər Əliyevin respublikaya rəhbərliyi dövründə yaradılıb.
Mədəniyyət və Turizm Nazirliyinin vəsaiti hesabına son illər qalereyanın fonduna yüksək bədii keyfiyyətə malik müasir təsviri və dekorativ sənət nümunələri toplandığını deyən nazir müavini hazırda qalereyanın fondunda 10 minə yaxın rəngkarlıq, qrafika, heykəltəraşlıq, dekorativ-tətbiqi sənət və müasir incəsənət əsərlərinin qorunduğunu diqqətə çatdırıb. Regionlarda təsviri sənətə marağı artırmaq və yeni istedadları aşkar etmək məqsədilə rəssamların yaradıcılıq emalatxanaları, ustad dərsləri və gənc rəssamların səyyar sərgiləri təşkil edilir. Qalereyanın elmi işçiləri tərəfindən sərgilərin, müsabiqələrin tədqiqatı, rəsm əsərlərinin elmi araşdırılmaları və rəssamlar barədə məlumatların toplanması işi həyata keçirilir.
Ə.Vəliyev qeyd edib ki, son on ildə xarici ölkələrdə fəaliyyət göstərən 25-ə yaxın səfirliyimizdə 250-dən artıq Azərbaycan rəssamının əsərlərinin sərgisi açılıb. İl ərzində nazirliyin xətt, eləcə də Rəssamlar İttifaqı ilə birgə yubiley, fərdi, yaradıcılıq, müştərək və digər səpkidə 100-ə yaxın sərgi keçirilib. Azərbaycanda və ölkə hüdudlarında açılan sərgilərin böyük əksəriyyətində nümayiş olunan rəsm əsərləri, əsasən, rəsm qalereyasının fondunda saxlanılan əsərlərdən təşkil olunur.
Veb-sayt haqqında məlumat verən qalereyanın direktor əvəzi Qalib Qasımov bildirib ki, saytın ana səhifəsi “Qalereya haqqında”, “Sənədlər”, “İncəsənət haqqında”, “Kolleksiya”, “Beynəlxalq əməkdaşlıq”, “Nəşrlər”, “Xəbərlər”, “Elanlar”, “Qalereyalar”, “Fotoqalereya”, “Videoqalereya” və “Əlaqə” bölmələrindən ibarətdir.
Azərbaycan, ingilis və rus dillərində fəaliyyət göstərəcək saytın əhatəli axtarış sistemi, xəritəsi və faydalı linklər də mövcuddur. Veb-saytda, həmçinin qalereyanın əməkdaşlıq əlaqələri, burada keçirilən tədbirlərə, görüşlərə dair məlumatlar əldə etmək və videogörüntülərə baxmaq mümkündür. Q.Qasımovun sözlərinə görə, son texnologiyalar əsasında yaradılmış Azərbaycan rəssamlarının vahid informasiya bazasında (infosourceazgallery.az) qeydiyyatdan keçməklə 270-yə yaxın rəssam və onların əl işləri haqqında məlumat əldə etmək olacaq.
Tədbirdə Rəssamlar İttifaqının katibi, Xalq Rəssamı Ağaəli İbrahimov, AMEA-nın Memarlıq və İncəsənət İnstitutunun direktoru Ərtegin Salamzadə və İsmayıllı Regional Mədəniyyət və Turizm İdarəsinin rəisi Elnur Hüseynov çıxış edərək çağdaş dövrdə doğma dildə incəsənət və təsviri sənətimiz haqqında mərkəzləşdirilmiş elektron vəsaitə tələbat və ehtiyacın danılmaz olduğunu qeyd ediblər. Bunu nəzərə alaraq virtual məkanda milli təsviri sənət irsinin qorunması və təbliği məqsədilə Azərbaycan rəssamlarının vahid informasiya bazasının yaradılmasının bu istiqamətdə mühüm addım olduğunu vurğulayıblar.
Sonda bu işdə əməyi keçən bir qrup əməkdaşa “Təşəkkürnamə” təqdim olunub.
Bölmənin digər xəbərləri
